早幾日見到有朋友仔介紹左可以強肺氣又對止咳平喘、支氣管炎都有療效燉湯，見小小豬依排都有少少乾咳，我估都可能係氣管敏感所致，所以就燉嚟滋潤下啦
可能大家都會同我有一個相同諗法，虎乳靈芝係咩嚟？但其實它係唔屬於靈芝科，係真菌科嚟呀。虎乳靈芝對補益肺氣，增强肺的功能有一定療效。平日小朋友係學校很容易感染傷風感冒，平時飲可以預防傷風感冒、强壯體質同埋增強抵抗力。不過病緊就唔好飲住，好返先飲。
虎乳靈芝都唔係好貴，我係藥材店買1舊大約係1両，都係$40。買嘅時候就係一舊舊，店員都會幫我地切片呀
好啦...講返今次嘅虎乳靈芝川貝燉雪梨材料先，虎乳靈芝6 片、雪梨2個、蜜棗3粒、川貝3錢及熟水2碗
虎乳靈芝浸10分鐘沖淨
川貝先壓碎少少，咁燉時就可以出味啲
雪梨去核切件
將熟水2碗連同所有材料放入燉盅內
再放入電子燉鍋燉2小時
燉好就飲得啦
哈哈哈...依個份量剛剛好足我地三口子每人一碗呀
味道就甜甜地，又冇乜藥材味，都幾好飲呀。不過只有一碗對小小豬嚟講都有啲唔夠喉，叫我下次燉多啲，等佢可以飲多啲哦！
不過，依個燉湯可以增強抵抗力，加上又唔難整，所以燉多幾次俾小小豬飲都幾好呀！
