早排帶埋一對仔女去探朋友，行行下見到有個好大嘅帳篷，就八卦過去睇下係乜嘢嚟，原來係一啲俾小朋友玩嘅免費藝術活動！叫做「Melodia外展社區藝術計劃」，唔同嘅時段有木偶劇場、雜耍體驗、鼓樂工作坊、撐桿偶製作、聲頻與科學實驗，仲可以免費拎一本故事繪本，阿仔阿女玩到忘晒形！今個禮拜大帳篷會巡迴去西九文化區，佢地已經叫我再帶佢地去玩！
睇返時間表，木偶劇場每逢正點開場，大約20分鐘，講Melodia嘅故事，主人翁美樂點樣排除萬難拯救星球，三位演員嘅演出都好生動。劇場完咗之後唔好走開住，因為工作人員會操控隻4米高嘅美樂木偶，可以排隊一齊影相。另外，記住喺詢問處填一份好簡單嘅問卷，就可以免費拎到一本Melodia故事繪本！
之後去咗玩非洲鼓，有好多唔同大細嘅非洲鼓圍成一個大圓圈，總之見到無人就可以坐埋去，跟住唔同嘅節奏一齊大合奏。期間阿仔仲主動舉手出去做打鼓示範，好叻仔！
打完鼓啱啱好可以玩到撐桿偶製作，其實係做一隻好似紙鳶嘅雀仔，有支棍同魚絲支撐住搖嚟玩。每人會派一份材料，步驟都幾簡單，跟住導師嘅指示將紙雀仔貼喺籐上面，再用顏料畫裝飾，貼喺支棍上面用髮夾固定佢，大功告成！
場內仲有兩個雜耍工作坊可以玩，一個係空中絲綢舞，另一個係呼拉圈。開頭阿女話想玩空中絲綢舞時都我都驚驚地，但係見都幾安全，而且係逐個逐個上前一對一咁試下唔同動作，地下又有好厚嘅軟墊，就俾佢去玩，阿女仲話好刺激想再排過！
場內仲有聲頻與科學實驗，其實係透過唔同嘅物件，好似水、粉末等等，睇下聲音係點樣存在，同埋原來高音同低音顯示出嚟嘅圖案會有唔同
帳篷外面仲可以印印水紙同畫花面，畫花面隔離有一個互動影相區，有埋道具提供可以一次過影4張相變成動畫，然後用QR code或者email可以即刻拎返，好得意！
呢本就係免費送嘅Melodia故事繪本，插圖都幾精美
之前誤打誤撞去到荃灣站呢個Melodia大帳篷，嚟緊今個禮拜六、日會巡迴去西九文化區最後一站，咁多嘢玩而且又係免費，決定今個禮拜再去過！
Melodia外展社區藝術計劃
日期：4月8日（六）、4月9日（日）
時間：中午12點至下午5點半
地點：西九文化區苗圃公園大圓表演場地
查詢：www.hkyaf.com/MelodiaEdu
另外喺4月尾仲有一個Melodia劇場體驗，係一個原創音樂劇，集合音樂、舞蹈、空中飛人、戲偶、形體戲劇同雜技等嘅原素喺裡面，有超過一百位年青表演者同專業藝術家同台演出。小朋友、學生去睇仲有半價添！
Melodia劇場體驗
日期：4月27日（四）至4月29日（六）
地點：伊利沙伯體育館
查詢：www.hkyaf.com/Melodia
