媽媽實在係太想食糖水啦，所以今日結果都係忍唔住要去買材料來煲糖水。可惜，爸爸係唔鍾意食甜品同糖水，所以我就決定煮來同小JM同埋工人姐姐食！
既然天氣咁熱，咁就不如整古惑嘅懷舊糖水——花生麥米粥！
功效：
花生具有益肺健脾及美容養顏之效；麥米益氣健胃，可預防衰老，而且仲可以令頭髮變得光亮、肌膚潤滑。
材料：
花生、麥米、糯米、片糖（適量，小B食就放少啲；大人就放返多少少）、水
做法：
1. 預早數小時將花生、麥米、糯米用水浸透。
2. 煮前將花生、麥米、糯米再過水洗淨。
3. 預備一煲水，煮滾備用。
4. 將花生、麥米、糯米放入煲中，以中火煲一個半小時即可。
5. 煲到咁上下時間就可以檢查下花生、麥米、糯米係咪都夠淋同已經煮開。
6. 加入適量片糖即可。
因為會俾小JM食既關係，所以我並無落太多糖，只係微甜就夠。如果大人食嘅話，先至再落返多少少片糖都得架！
麥米係一樣啱一家大小，同時又啱孕媽咪食用嘅食材來架！就連坐月中嘅媽媽都一樣啱食，只要變換一下材料就可以啦！
蓮子百合紅棗麥米湯
功效：
有助補血養顏，防治失眠心悸，可以改善疲勞，增強免疫力，促進血液循環，令皮膚變得細嫩紅潤。
材料：
鮮蓮子、鮮百合、紅棗、麥米、冰糖
做法：
1. 先將鮮蓮子、百合洗淨，紅棗切開並去核，麥米預先用清水浸數小時。
2. 預備一煲水，煮滾備用。
3. 將紅棗、麥米、蓮子放入煲內，煮個半小時再加入百合。
4. 最後再放入冰糖即可。
爸爸們又要「學起來」，氹一下媽媽啦！
