做咗媽媽之後，經常要抱B、換片同餵奶，好容易會搞到腰酸骨痛兼有媽媽手。今次蜘蛛媽媽鄭麗莎就會教大家同各種酸軟痛症Say Goodbye，喺屋企都可以輕鬆完成！
一、媽媽手
A) 手肘貼近腰間，手臂伸直，手指指向地下，另一隻手作為輔助，前臂會有拉扯嘅感覺。15秒為一組，每次做兩組，做完手掌反轉做手背。
B) 抱得BB多，手腕同手肘難免會覺得酸軟，呢個時候媽媽可以輕輕按摩吓舒緩返，可以邊睇電視邊做，好方便。每個位置打20-30個圈。
二、頸部酸軟
頭向一個方向垂低，用手幫助施壓，頸部會有拉扯的感覺，維持15秒，然後放鬆再壓落去，做完左邊做右邊，瞓覺前或起身做更佳。
三、膊頭酸軟
通常抱BB個人會唔自覺地駝背，幫BB沖涼、換片都不時要彎腰，膊頭難免會酸軟。呢個時候我哋可以提高膊頭，然後縮起，貼近耳仔，再慢慢向下壓，重覆做10次。
做完10次後，可以轉動膊頭，郁動吓肩關節，幅度可以大一點，10個圈轉前，10個圈轉後。
四、強化肌肉
A) 舒緩酸軟之後，記得做埋強化肌肉嘅動作，照顧BB就更得心應手。首先拿起啞鈴(無啞鈴可用水樽代替)，手肘貼近腰間，做二頭肌嘅彎舉動作，期間唔好左右擺動。20下為一組，每組做3次。
B) 利用一條毛巾強化肩背，雙手舉起，然後向下，手肘指向地下，再向上、向前。一前一後為之一下，重覆做20下。緊記不要縮起膊頭，誤用肩頸力量就不能強化肌肉。
世上沒有醜女人，只有懶女人，呢幾套動作非常簡單，大家不妨試吓喺屋企做。記得要配合均衡飲食！
