係香港已經好鐘意行$12店，今次去韓國知道Daiso進駐左首爾，而且仲有8層樓高，超開心呀！第一篇韓國之旅遊記分享，急不及待先同大家分享Daiso啦！
由於酒店係明洞，每次行過都會見到Daiso在呼喚我?終於係第4天晚上安排左飯後時間去行！前3日每日都心癢癢！
8層高的Daiso夜晚燈火通明，係明洞遠遠都見到佢大樓上的四方骰仔名牌！
黎到個門口，我終於黎到韓國Daiso喇！
當晚我和爸爸與Timtam仔一起去，揹帶車仔都冇拎，爸爸抱住30磅的仔仔第一時間就話搭電梯，先行最高的8樓往下行，後來我發覺這是非常錯誤的決定！大家先睇睇每層的產品分佈！
其實我都知，8樓至5樓我未必有野要買，咁黎到都好想睇睇同香港有咩唔同架！點知爸爸行左兩層就話要走（爸爸唔太鐘意行街！）加上Timtam仔又扭計，最後佢抱住仔仔先離開去搵其他家人食炸雞，我自己一個人繼續行！
如果你都有唔太鐘意行街的同遊人，建議先由2樓開始向上行，睇落去我的介紹你就會明白！其實2樓至4樓係最多精品玩具買，好多香港都冇得買架！等我逐層介紹一下！
先介紹2樓，佢註明係食品，但其實都有一半用左黎放精品，有好多我鐘意的鬆弛熊產品，有襪啦、化妝袋、tote bag!
2樓：襪仔每對HK$7 ! 超抵呀！質地仲好好架！
2樓：鬆弛熊tote bag 2000won (HK$14), 化妝袋細2000won(HK$14) 大3000won(HK$21)！
2樓：另外有可愛的多士麵包精品，每件都軟棉棉忍唔住都要抱抱一下！
2樓：方包cushion 像真度極高！
2樓：另一邊就係食品區，好多韓國小食香港都冇得賣，呢度每件都係1000won(HK$7)咋！
2樓：各類薯片、杯麵都係1000won咋！
2樓：綠茶控呢度有好多綠茶食品！
2樓：韓國出產叮叮飯，可以配埋咖哩！
2樓：另一邊有無數設計精美茶杯保溫杯，價錢都係1000-3000won ！
近樓梯位有個傳統韓國小精品corner, 好多韓國精品都幾靚，例如櫻花行李牌、水樽、地標磁石等！
終於行完2樓，3樓仲精彩呀！
3樓係文具、玩具部，如果係因有小朋友，呢層你可以行好耐！
先黎就係Hello Kitty Corner! 我唔係係Hello Kitty Fans都覺得好靚呀！
隔離係士多啤梨和櫻花圖案產品，每件產品都好鬼靚！
另一邊仲有迪士尼精品，好多米奇、米尼產品，Timtam仔最鐘意米奇，買左好多比佢！
仲有好多文具用品，要返學的小朋友黎呢到一定好開心！
呢度竟然都有姆明文具產品！
仲有軟棉棉的公仔，小朋友手抱剛剛好，每隻都只係5000won (HK$35)!
3樓另一部分就係放玩具產品，海量玩具都係1000 -3000won（HK$7-21)!
我都入手左車車比Timtam仔，真係太抵玩！
終於行完2、3樓，呢兩層係必行！到4樓都有好多精品，不過就以家居用品做主題，有我鐘意的Minions! 每對襪都係1000won（HK$7）！用黎做手信最正！
另一邊有鬆弛熊頸圈，係機場落機時見到個小朋友手裡都拎住一個，超可愛！都係5000won(HK$35) ! 好抵玩！
呢隻間條色都好靚！
以下呢隻北極熊公仔都好得意！
仲有呢款黑白英文字做圖案的家品都好有特色！
黎到5樓，主要係賣寵物用品，有養貓貓狗狗的朋友一定好開心！產品都好靚好有特色！
到6樓，主要賣浴室用品，竟然都有海棉寶寶卡通用品！
另外，呢隻勁靚雲石紋樽，Ikea買要HK$7-80, 呢隻3000won (HK$21)！
如果你酒店冇提供紙拖鞋，又唔記得自己帶拖鞋，呢度每對都只係3000won(HK$21)！我試過好好著，好似話好多韓國人都係著呢隻拖鞋！
小朋友便廁，3000won(HK$21)! 不過唔知點拎返香港!
黎到7樓喇！呢層主要賣收納用品！其實香港都有，所以覺得冇咩特別，不過好鐘意呢個Tiffany Blue的保暖壺，只係5000won(HK$35)! 可惜Timtam仔當時正在扭計，宜定睇返真係好想買走佢呀！
另外呢d木製的收納箱我都好鐘意！木的質感好滑身，唔會感覺太薄和粗糙！
其他產品香港都有就唔多講喇！
終於黎到8樓！最後一層喇！呢層主要係廚房瓷器用品，好多都好靚！不過我冇需要買，不過睇下都開心！
Oh! 忘記左仲有地下，佢地叫一樓，主要係賣化妝美容用品！
多款化裝掃、粉撲！
真係多到唔知點選擇！
棉花都咁多種！
行完哂喇！以下有些少Tips比大家！等大家都可開開心心咁shopping!
Daiso購物Tips:
1. Daiso係有得退稅架！只要買滿三萬won以上就可以退稅！記得帶定passport, 佢會打印一張退稅單，要係機場辦理退稅手續，遲d會詳細講下退稅的方法和程序！
2. 最好早上黎，晚上7pm後，比錢條人龍keep住有2、30人！ 真係冇透張！
3. 如果有小朋友或者時間唔多夠，由2樓開始行上去會開心好多架！
Daiso前往方法：
在地鐵1、4號線的「明洞站」，搵1號出口，直行步行約30秒左右，就會見到8層 Daiso 入口，其實就係明洞大街對面，一望就望到！
***********************
呢篇打左我2日時間！第一次寫遊記，原來真係唔容易，希望大家多多支持！Timtam仔第一次去旅行，每一日都新奇好玩刺激，好想成個旅程都好好紀錄低，仲有分享下第一次帶BB去旅行的經歷分享，希望幫到其他爸爸媽媽有個愉快旅程！
FB page會有更多靚相分享：
*************************
韓國明洞8層Daiso
地址：首爾特别市中區南山洞3街13-25
營業時間：每日 10am – 10pm
交通：地鐵4號線「明洞」站1號出口，走約30秒
**************************
