「走塑FUN墟」@大館

作者:環境保護署

2019-06-03 568


各位爸爸媽媽,週末放假唔知帶小朋友去邊度玩好?又怕留喺屋企會悶親?嚟緊星期日就有個又有教育意義又好玩嘅活動推介俾你啦!

就係環境運動委員會(環運會)與環境保護署(環保署)喺6月9日舉辦嘅「走塑FUN墟」!為喚醒全球民眾的環保意識並共同保護屬於我們的地球,聯合國將每年6月5日和6月8日分別定為「世界環境日」和「世界海洋日」。而環運會與環保署為響應這重要日子,每年都聯同各個政府部門、非政府組織、綠色團體和社區組織舉辦綠色「Fun墟」,一齊宣揚環保訊息。

潮流興「走塑」,所以今年嘅「世界環境日」活動就趁勢與「世界海洋日」Crossover,透過「走塑FUN墟」呼籲大家由日常生活做起,不要再用即棄塑膠用品,為保護地球生態環境出一分力。今年嘅活動仲會移師到中環大館舉行,大人小朋友除可吸收環保知識外,亦可順便參觀這座甚具歷史保育價值嘅建築物,一舉兩得。

「走塑FUN墟」適合全家大小參加,除了有以「走塑、走即棄」為主題的相關互動攤位,還有專題分享及環保工作坊等活動,用不同形式喚醒大眾對塑膠垃圾問題嘅關注。場內亦有「小朋友聽故仔」環節和童書漂書活動,透過得意故事書教識小朋友點樣做環保達人,。同場另有由陳年海洋塑膠垃圾打造嘅藝術品,讓市民從另一角度明白海洋塑膠垃圾問題嘅嚴重性。

行完攤位肚餓,可以到Food Corner飲杯解喝特飲,試下食得落肚嘅窩夫餐具,及用剩食製作而成嘅「綠升級美食」。大家可以邊食邊欣賞現場音樂、魔術和雜技表演。大嘥鬼仲會隆重登場同大家一齊selfie添!

靜靜雞話你知,玩完遊戲聽完講座可以儲「e印仔」,換領限量版大嘥鬼禮物,大嘥鬼Fans唔好錯過喇!記得帶埋減廢四寶(水樽、餐具餐盒、手巾仔、環保袋),有你著數呀!

有得食、有得玩、有嘢學,仲免費入場,仲諗?一於帶埋小朋友6月9日(星期日)去大館行「走塑FUN墟」!

如果大家想知道更多有關活動的詳情,可以瀏覽活動專頁及環境運動委員會的Facebook專頁:

活動專頁:www.facebook.com/events/2677576945603388/
環境運動委員會Facebook: www.facebook.com/ECC1990/

活動名稱:「世界環境日x世界海洋日 2019 – 走塑FUN墟」
日期:6月9日(星期日)
時間:上午11:00 – 下午6:00(免費參加)
地點:中環荷李活道10號 大館 檢閱廣場、洗衣場石階及E倉低層

主辦:環境運動委員會、環境保護署
贊助:環境及自然保育基金