呢個世代嘅教養課本對於家長嚟講確係唔易讀，「自理能力」、「同理心」、「情緒智商」等等，愈來愈多超出我哋認知嘅名詞，到底點先知道自己小朋友達唔達標，抑或係佢受到生理問題影響，所以比較「難搞」？
提到自理能力，鯊魚太早幾日就見到有JM提問，有小朋友去到小四，都依然扣鈕扣錯位、條褲前後調轉著，呢啲行為表現係基於恃寵生嬌？定自理能力差？各位JM們都有唔同見解！
「每位小朋友都有佢嘅學習時間表，即是有些小朋友讀書認字叻、有些社交叻、有些運動叻、有些藝術音樂叻。有些小朋友就好好彩樣樣達標。 」
「通常最大原因係因為媽媽唔肯鬆手，唔俾佢撞板。你想佢戒甩呢啲大頭蝦行為，必須學會放手，隻眼開隻眼閉，順其自然。」
「依家呢個年代嘅長輩真係太「愛錫」小朋友，令到佢哋成為一個笑話！」
討論區熱話：縱慣？定自理能力差？
討論區熱話：縱慣？定自理能力差？
睇完大家咁講之後，鯊魚太都覺得好難以單一事例去總結小朋友到底係自理能力不足，抑或受生理條件影響而做得唔好，但其實呢個問題父母就應該最清楚，到底係你無比佢學，定係佢學極都唔識？簡單去講「縛鞋帶」呢個小小嘅自理單元，都唔好講家長下下代勞喇，若然小朋友A從來都只係著魔術貼嘅鞋，咁「縛鞋帶」對小朋友A根本係未開展嘅領域，亦無必要去學，唔識大概都好正常！
如果你話「咁咪一世著魔術貼囉！」，表面上確係無乜急切需要去正視自理問題，但其實從培養自理能力過程中，小朋友要學習嘅唔單止係照顧自己，當中心智成長都好重要，好似話承擔責任、爭取成功感等等；自理能力同時影響良好嘅行爲習慣，提升意志同個人品德，長大後更容易適應社會同周圍環境。
講到底，點先可以幫小朋友訓練自理能力？除咗身教同鼓勵，最緊要都係適時放手，比佢有發展空間，讓小朋友有錯嘅機會！唔好因為煩而凡事代勞，好似比小朋友自己食飯咁，食都周圍都係之後又係要抹，而且食得又慢又少，不如餵佢好過啦！又或者執玩具咁，叫得佢執，我都執完瞓覺啦！咁樣只會養成小朋友嘅惰性！
