關愛座定批鬥座？有孕婦乘港鐵時坐關愛座，卻被醉酒老伯單打，稱「後生仔女」不應坐關愛座，孕婦忍無可忍，當場一句反撃並於網上發文抒發憤怒，獲網民力撐！
一名自稱是高齡孕婦的樓主於Facebook群組發文，稱自己於星期一（6月12日）工作了14小時，下班帶同一袋袋嬰兒用品搭乘港鐵，坐在關愛座上休息。未幾，兩名滿身酒氣的伯伯上車，其中一人坐在她旁邊的關愛座座位，另一位則未能找到座位，遂口出狂言︰「個位應該畀老人家坐、畀有需要人士坐，後生唔應該坐！」
準媽媽認為老伯出言「單打」，即時駁斥「我大肚喎」，老伯則回應「我唔係話你」。然而，準媽媽稱老伯繼續高談闊論，「「話應該取消關愛座，又話關愛座適合知書識禮的人坐，讀咁多書都唔讓座（下刪一堆難聽的說話），搞到啲人一個二個望住我，好似我坐係我唔啱」。
她深感委屈，又指因為自己「齋肥肚唔肥四肢，加上有個媽媽走佬袋同揹帶喺身前，個肚就唔明顯」，覺得別人會因未必留意到她是孕婦而怪責她。幾個站過去，她終於忍無可忍，當場大聲反擊︰「飲醉酒唔代表可以亂話人」，亦表明她不會讓座。
然而她怒氣難平，遂於網絡上抒發己見，又嘆息當時車上無其他乘客幫忙出言相勸︰「明明我有需要，大住個肚都要返工返咁多個鐘，點解要讓畀呢啲飲醉酒又要讓座嘅人，仲要畀佢兩個話？我前世欠咗香港啲X老？我就係知書識禮至知道呢啲嘢唔應該啞忍！」
不少網民力撐這位準媽媽，指出關愛座非長者專屬，有需要的人就可以坐，質疑該兩老恃老恃罪就不尊重別人︰「明明個位唔係『老人座』，就一堆人覺得得嗰個位先要讓座」。有人則關心媽媽的情緒，「「出咗啖氣好過自己屈住，對你對個B更加唔好」。
