每個小朋友都一定用過顏色筆啦！但係你又知唔知道蠟筆或者水筆係點樣製造㗎呢？晴朗都好鍾意畫畫，如果可以了解埋顏色筆嘅由來，畫畫就變得更有趣味喇！一於去一趟全台灣僅存嘅其中一間蠟筆工廠——「蜡藝彩繪館」，話唔定可以搵出答案呢！
門口有好多支巨型蠟筆，離遠已經可以見到工廠位置喇！Yeah!!!入去囉！入去囉！
首先梗係要買飛啦！每張200蚊台幣，即大約$53港紙就已經可以玩齊蜡藝館嘅5個館喇！
仲要每張附有100蚊台幣嘅購物券，可以留番最後shopping時間用。好抵呀！
(1) 彩繪塗鴉區
假日特別熱鬧，好多人都帶埋小朋友嚟玩呀！小朋友可以先在彩繪塗鴉區油下顏色，熱下身~
小朋友揀啱想要嘅圖案就可以去油顏色！每張枱上都有充足嘅顏色筆，小朋友想點油就點油，盡情發揮無限創意啦！
將拓印版放響圖畫下面，油出嚟就會有拓印花紋效果㗎喇！
晴朗油完一幅又一幅，似乎對自己嘅畫作都好滿意喎！原來拓印型版畫係咁好玩㗎！大功告成！就係咁簡單！每幅都係用心創作。好可愛呀！
完成作品後，可以過去白板筆試用體驗區度塗鴉，啲筆全部都係工廠嘅產品。白板筆無粉塵、無毒不刺鼻又易清潔。而浴室蠟筆融水性好，又易擦除。可以畫響玻璃、磁磚、白板、鏡子、塑膠甚至金屬等材質上㗎！
(2) 蜡筆、彩色筆DIY區
開始一連串嘅diy喇！首先學嘅係整水筆，影片好詳細咁講解每一個步驟~
呢部就係工廠用嘅彩色筆自動組裝機器喇！而我哋將會整嘅梗係人手組裝啦！
職員再補充少少，明白晒！大家可以動手整囉！材料方面有墨水、棉心、筆管、水筆蓋、筆尖同尾塞。至於工具，就有大鎚仔。Are you READY??
YES!!! 信心十足咁喎！就拎起鎚仔開始啦！
1. 先用鎚仔將筆尖加入筆管內
2. 將棉心注入墨水，放入筆管內
3. 壓入尾塞
4. 用鎚仔揼一揼尾塞確保已經吸實筆管
5. 套上筆蓋就完成喇！
話咁快就整好一pack六種顏色嘅水筆，好滿足呀！
跟住落嚟！我哋就要學點整字母蠟筆喇！首先揀選自己喜歡嘅字形模具~
然後就攞去注入顏料~
模具一個跟住一個排住隊加入自選顏色嘅顏料~
注入顏料後，繼續排隊運送至第二部機器將佢變成固體~
4個代表住我哋英文名嘅字母蠟筆誕生喇！係咪好靚呢？
製作蠟筆唔只一個方法，自選一啲顏色粒粒，即將要學習另一個做法喇！
將啲顏色粒粒倒入模具，然後拉手柄大力壓下去~
踩下腳掣，將蠟筆由個模倒出來~
壓製出來嘅蠟筆都整好喇！原來晴朗混合咗唔同顏色粒粒，所以整出嚟嘅係七彩蠟筆呀！Yeah!!!
(3) 人體彩繪區
油顏色再唔局限於紙張上，今次係油響皮膚上面呀！顏料亦係工廠嘅產品，安全無毒、好畫好擦同唔傷肌膚。睇下晴朗畫得幾開心？
晴晴好滿意自己手上果兩朵花呀！cheers~
(4) 變裝區
彩繪完之後，可以到變裝區挑選自己喜愛嘅服裝嚟個大變身，變變變！
(5) 星光大道區
裝好身當然要行番轉catwalk啦！但係主角呢？去晒邊度？？
原來去晒shopping呀！果然同媽媽一樣咁喜愛shopping喎！
產品有蠟筆、粉蠟筆、彩色筆、人體彩繪筆、3D造型蠟筆、傢俱修補筆、道路記號筆等，多不勝數~
圖書、畫簿都有添！啱晒晴晴啦！
結果買咗4盒蠟筆，扣埋門票嘅優惠券只需80蚊台幣咋！即係大約$21港幣，係咪堅抵呢？
蜡藝彩繪館活動豐富又好玩，我哋都玩得好開心呀！
路過佢哋正在興建中嘅新館，蠟筆比起舊館更顯巨型，而左邊嘅DIY館亦設計得非常可愛！預計2017年5月啟用。下次來宜蘭一定要到新館玩多次呀！
我哋響蜡藝彩繪館學識咗整水筆同蠟筆，呢啲經驗好難得！響香港唔係咁容易學到㗎！唔只小朋友玩得開心，大人都學識咗好多呀！不過蠢咗！應該買多啲唔同種類嘅顏色筆，好似人體彩繪筆在過時過節實大派用場啦！品質好，又平過香港買嘅咁多。下次再來，瘋狂購物一定係指定動作啦！好玩又學到嘢，仲要咁平添！簡直係帶小朋友去宜蘭嘅必到景點呀！
去片！睇下我哋響蜡藝彩繪館嘅精華片段啦！
