與小朋友出街，都應時刻看管好小朋友以免發生危險。日前有家長在網上發文，投訴巴士公司在椅背加裝充電插座，有機會電親小朋友，妄顧其安全，更狠批：「巴士公司可唔可以用腦諗嘢？」這位家長的言論惹來熱議，認為「插頭好安全，你班怪獸家長最危險」。而新巴城巴則在其社交平台發文，籲這位家長「放心啦」，以專業角度解釋椅背充電插座的安全性。
更多文章：【有片】男童衣服捲扶手電梯縫隙 爸爸低頭玩手機 幾秒後才知出事！
這位家長日前在社交平台發文，稱與女兒坐巴士才發現椅背有充電插座，認為此舉只為方便人打機，並無實質意義。「就嚟開學啦，小學生篤手指入仲會電埋旁邊的人，超危險！巴士公司可唔可以用腦諗嘢？」
新巴城巴隨即在網上發文，指知道家長的擔心，但充電插座非常安全！工程部人員表示：
「放心啦！我哋巴士嘅充電插頭只有 5V直流電輸出，單頭嘅插頭電流輸出係2.1A；而雙頭插頭嘅電流就係3A，每個插頭最多只有1.5A（實際情況視乎電子產品及充電線規格）。成個USB充電系統都只係一個特低電壓嘅電力系統，非常安全。而且所有USB插頭都符合國際安全標準，唔會咁易漏電。所以即管放心使用啦！」
新巴城巴又在貼文補充，椅背的USB充電插頭不可插入手指，呼籲大眾愛護公物，並小心照顧同行兒童。網民留言，稱讚巴士公司：「諗唔到一個家長隨口噏， 貴公司都會認真發文回應。」又有人認為小朋友亂伸手入充電口，是家長的責任去指導小朋友不應這樣做，而非「怪人哋做咩放個充電口喺度」。
其他網民回應：
「你同怪獸家長講5V、3A、2.1A、1.5A…佢當你係巴士線咋……」
「人地家長成屋都係USB頭220V直出，梗係怕電死人啦！」
「強烈要求貴公司整個人力車服務，免得巴士會撞死人哋個仔。」
「用過，真係幾方便，電流咁細點會危險。」
