究竟係唔係有需要食？攝取魚油DHA知多啲！

成日喺保健商店見到唔同嘅孕婦同嬰兒DHA補充品，究竟係唔係有需要食呢？

首先我地要知DHA係咩？DHA係不飽和脂肪酸omega 3 嘅一種。

佢有幾個功效：

1. 腦細胞嘅主要成分

2. 對眼睛視網膜好重要

3. 保護心臟血管

食物中尤其是深海魚，就含有豐富嘅DHA，而對孕婦嚟講，每日需要200毫克DHA，喺日常飲食其實就已經可以攝取足夠份量。

我自己就每星期都食2次三文魚、沙甸魚同鯖魚等，有足夠DHA之餘又唔使驚食得太多有水銀毒。

但如果平時孕媽媽少食魚，或通常都係食養魚，就不妨食番啲DHA補充品啦。

市面上嘅DHA主要有魚油同海藻油兩種。海藻油普遍價錢貴啲，適合素食或怕魚腥味嘅孕媽媽，但功效方面就同魚油無大分別，最重要都係分量同濃度，有啲品牌每粒嘅DHA份量其實並唔夠，所以要睇清楚營養標籤呀！

另一方面，要留意嘅係「魚油」同「魚肝油」係唔同㗎。魚油先係補充omega 3 DHA，而魚肝油係補充維他命A㗎，食得太多仲會積喺體內，有機會形成畸胎！所以一定要睇真啲先好食呀！