2020-04-21

13.3K

【二寶孕記】清胎毒時間到 清胎毒湯水 減低濕疹風險

好多時都會聽到人講,你「清胎毒」未呀?
如果今胎係第一胎嘅你,等我分享一下咩係「清胎毒」啦,而作用又係乜嘢?

胎毒其實係孕婦懷孕期間吸收到嘅毒,例如: 飲食唔節制、食煎炸肥膩、過度滋補、脾氣暴躁、肝火旺盛,都有機會導致母親內熱過重,將「毒」傳俾BB,造成胎毒。

而胎毒又會對BB產生咩唔好嘅反應呢?
例如: 嬰幼兒出現濕疹、過敏性皮炎、皮膚出現瘡癤等等。

陀二寶嘅我,自己同先生本身有鼻敏感。上胎清胎毒清得唔夠,所以和牛B的確患有濕疹問題。
到而家濕疹,仍然一直纏繞住和牛B....都真係好苦惱!

更多文章:孕婦與魚類的重要關係

有咩食物可以清胎毒?

孕婦可以選擇涼性嘅食物,例如: 西瓜*、綠豆沙、豆腐、腐竹、椰青、荷葉、薏米、白蓮鬚**、冬瓜皮、粟米鬚等。

*西瓜: 要注意果糖陷阱,如果有妊娠糖尿嘅子婦,都要控制食西瓜嘅份量哦。
**白蓮鬚: 有一個傳聞,體質啱嘅媽媽,飲咗會易啲生。相反體質唔合適,飲咗就會陣痛好耐都生唔到…(我就係後者,當年一飲完即刻頭暈兼作嘔…然後作動十幾個鐘先生到和牛B)。

另外,保持大便通暢都好重要,所以要食多啲菜、飲多啲水。

幾時開始清胎毒

我自己就喺33週中期開始,但每個人體質都唔同,建議諮詢中醫意見再開始。如果太早進行清胎毒,BB未完全發育成熟,進食過度寒涼嘅食物,係會引起子宮收縮引至早產o架!! 所以,唔好心急呀!

更多文章:產後脫髮不可怕!醫生建議改善現象的多個方法

【清胎毒湯水分享】

袪濕消腫湯

材料:
蓮子...........50克
粟米鬚........50克
鮮冬瓜皮.....100克
豬?肉........200克
蜜棗...........3粒

做法:將以上材料洗淨,放入煲,加水1500毫升,用大火煲至水滾後,改用細火繼續煲1.5小時,加鹽調味即成。

功效:清熱利水消腫。

桑寄生蓮子蛋茶

材料:
桑寄生....1兩
蓮子.......1兩
雞蛋.......2隻
片糖.......少許

做法:將雞蛋煮熟剝殼,再將桑寄生放入湯袋,加6至6 碗半清水同蓮子,用大火煲至水滾後,改用細火繼續煲2小時,加適量片糖調味。

功效:補肝壯腎、養血祛風同安胎催乳嘅作用。

腐竹蛋糖水

材料:
水.......5-6 杯
腐竹....2大片
雞蛋....2隻
冰糖....適量

做法:將雞蛋煮熟剝殼,腐竹清洗及浸淋後,大火煲10分鐘,改用細火煲45分鐘至1小時,加適量冰糖調味。

綠豆沙

材料:
綠豆.....2兩
陳皮.....1/4片
乾海帶..2兩
水........2000毫升
片糖.....適量

做法:乾海帶洗淨浸水切絲, 以大火煲滾,加入全部材料(片糖除外)再煲滾後,轉文火煲1-1.5小時,直至綠豆淋身, 最後加適量片糖調味。

**由於綠豆沙偏涼,所以建議喺懷孕35周後先食。

Facebook專頁: 和牛B嘅成長專頁

【編按:以上內容為作者之個人意見及立場】

相關文章

十大徵狀表示孕婦需「清胎毒」!信民間偏方有機會早產?

【懷孕分享】清胎毒湯水 沙參玉竹素湯

緊貼新冠肺炎最新相關資訊