2019-11-25

1.8K

【包媽孕記】包包首次做主角!百日宴派對好主意

包包嘅百日宴早前圓滿落幕啦﹗正值香港風雨飄搖之際,晚宴當晚都遇上旺角封站賓客提早離場,好在事先安排妥當,大家都早到場影咗好多靚相,好快就收齊相可以分享啦~

攝影師:
首先要有咁多靚相,最功不可沒當然歸功攝影師!

由於好多親友都想分享喜悅,百日宴預計開8至10圍,為免影漏相包媽都希望請返專業攝影師,幫忙記錄重要時刻。

市面上平起上嚟真係可以幾百蚊都有,但質素當然要將就返啦,亦有媽媽GP朋友仔請個中價位但收相反晒光,真係呢……

湊仔真係好忙無咁多心力好似結婚時不停搵不停比較,最快方法就係—搵返BIG DAY攝影公司咪得囉!!當日攝影師勁準時到場,自動自覺幫我影闣DECO、餐前小食嘅相,中間我入咗新娘房餵奶都無偷懶,幫手影低好多花絮照,仲有好多一家三口合照。

唔係企定定架,好似婚禮SNAP SHOT咁,好溫馨好靚呀~

仲捕捉到包包好多得意表情動作,連全晚得一下突然吹口水波都影到~~

真心勁推介!

餐前小食及蛋糕:

無論婚禮定百日宴,都會有賓客提早到場麻將耍樂,而百日宴大部分都係長輩老人家,candy corner太潮太甜唔多適合。包爸包媽婚禮時都係整咗個印尼糕點corner。

鹹甜點都有仲要唔貴又好味,賓客一入門口就圍住張檯食唔停口,顏色豐富又夠特別,絕對一見難忘!

其他包媽文章:
【包媽孕記】大愛仙氣孕照(同場加映閨密照靚相)
【包媽孕記】做媽媽原來連生病權利都沒有……
【包媽孕記】終於足月了!準媽媽孕期十萬樣擔心

而蛋糕方面包爸包媽本身好唔鍾意糖皮蛋糕,想搵好食又靚嘅款式,唔使太大唔好太貴,始終都係主要用嚟影相,最終訂咗呢款雙層蛋糕。

6吋加4吋夠24人食,加埋朱古力牌八百蚊鬆啲,內餡揀咗士多啤梨味,好好食呀~

DECO:
百日宴同婚禮一樣,志在同親朋好友見面影相,本身如果圍數再多啲13圍以上,A場有返B&W結婚時個中空蝴蝶牆,DECO呢PART就唔整架啦。不過我地最終開8圍用B場,所以包媽都要諗諗計。

咁啱婚禮時嘅花藝師開拓DECO市場,一拍即合搵佢幫包包佈置。包爸包媽真係零藝術細胞,SEND咗啲網上百日宴圖片,揀埋主題顏色俾佢,好快就畫咗設計圖俾我地過目!好靚呀!汽球半拱門+裝住汽球嘅BABY盒。

夾住座位表及相片嘅ARCH

親友都話好有心思,小朋友見到更加興奮!

場地:
早在2月BB展已經落訂,因為包爸包媽一早決定返回婚禮場地舉行百日宴。

無論地點(雅蘭中心MTR旁)、食物(好食到大家咁趕都清碟兼爭相打包)、價錢(三千幾全包無加一),有送印埋BB相嘅POSTER、席珍(即MEAU),仲有回禮盒仔,最簡單入紅雞蛋已經好得體!甜品除左紅豆沙湯圓仲有MINIION公仔流沙包,好SURPRISE呀!

其他QE系列BLOG:
【包媽孕記】伊利沙白醫院QE L block登記方法及第一次產檢流程分享
【包媽孕記】QE物理治療部產前運動班及分娩球班
【包媽孕記】孕期最後一個關卡: QE做B鏈檢驗
【包媽孕記】QE走佬袋懶人包(實戰後清單)
【包媽孕記】QE 順產27小時全紀錄(上)
【包媽孕記】QE 順產27小時全紀錄(中)
【包媽孕記】QE 順產27小時全紀錄(下)

【編按:以上內容為作者之個人意見及立場】

相關文章

【坐月神隊友】愛妻號親手下廚 設計30日坐月餐單

「夏日優惠首次試做價」$980體驗全方位slimum®️產後修復療程

【我的開刀經過】弟弟出世了!

第三胎產後紥肚分享

緊貼新冠肺炎最新相關資訊