2019-11-19

3.6K

想做全職媽媽湊BB?辭工前的4個考慮

「你生完BB後會唔會繼續返工?」、「BB出世後邊個湊?」呢兩條問題,相信大部分孕媽媽都答過唔止一次。其實懷胎10月生BB,之後坐月朝夕相對,媽媽都會覺得如果自己能夠親自湊BB,每時每刻都陪住,見證每個成長階段,會係最完滿。如果想做全職媽媽,要考慮啲咩因素?

討論區熱話:想做全職媽媽,但另一半反對


1. 家庭經濟負擔得到嗎?
香港地百物騰貴,BB愈大使費愈高,剛出生時要買尿片、奶粉、BB衫;之後上playgroup、買益智玩具;入學後要書簿校服、興趣班等開支,如果媽媽辭咗份工喺屋企湊BB,只靠老公一人賺錢,三人使用,咁啱仲有長輩需要供養,加埋屋企燈油火蠟支出,真係要認真計一計經濟上負唔負擔得到。

2. 會唔會考慮更彈性嘅工作安排?

如果媽媽係非常熱愛工作,但同時又希望留更多時間陪伴BB成長,可同公司傾傾安排半職或兼職嘅工作?如果公司安排唔到,又或者真係唔想再做呢份工,現今世代只要屋企有電腦同上網,全職媽媽都可以搵一啲兼職或者freelance,在家工作賺少少生活費幫補開支,又可以自主買下心頭好。湊BB之餘持續工作,自己唔會同社會脫節,做個「貼地」嘅媽媽!

3. 係咪有足夠嘅育兒能力?

做全職媽媽除咗要照顧BB起居換片沖涼之外,仲要陪食、陪玩、陪瞓,淨係其中一樣「氹瞓教」,已經可以「被BB玩」足1個鐘甚至更耐。全職媽媽一個人氹掂晒食玩瞓呢3樣,可能已經冇咗半日,仲要煮飯、洗衫、做清潔,打理一切家務,真係忙到無時停,容易產生無力感、焦躁、厭惡等情緒。所以全職媽媽需要極高嘅心理質素、情緒智商同驚人嘅耐性。24小時照顧BB同屋企,要忍受BB不可理喻嘅哭鬧,唔係個個媽媽可以應付到。

4. 有重回職場嘅打算嗎?
媽媽必需要知道,離開職場愈耐,愈難重投。如果媽媽真係決定要全職照顧BB,要預算係永久嘅安排,定係短暫三數年嘅安排。如果媽媽仲有重投職場嘅打算,湊BB同時最好繼續增值自己,強化自己工作相關嘅技能,如果能夠保持兼職或freelance工作,會係將來重投職場搵工嘅籌碼。

【編按:以上內容為作者之個人意見及立場】

相關文章

【坐月神隊友】愛妻號親手下廚 設計30日坐月餐單

「夏日優惠首次試做價」$980體驗全方位slimum®️產後修復療程

第三胎產後紥肚分享

冬天坐月媽媽冇煩惱

緊貼新冠肺炎最新相關資訊