睇得深宮劇多，見到啲皇帝妃子好多人服侍，覺得好似好正咁，其實香港地嘅小朋友好多都係公主王子，程度遠超以前講嘅「飯來張口，衣來張手」。近排有報導提到有中學生唔識沖涼，嚇親一班網民，親子王國就有人出Post，引來一班網民留言，盡數見過嘅零自理能力事例，而家就同大家由無咁驚嚇嘅Level 1開始睇起！
Level 1：提子去皮去核
有網民分享見過好多阿媽肯逐粒提子去皮去核，或者每粒車厘子去核先畀小朋友（甚至係超齡港童）食，小朋友可能出到街見到「真」提子車厘子，會問：「咩黎架？」或者「有皮有核嘅提子我唔識食架！」
Level 2: 媽媽：BB會怕怕～
家長改唔到口，小朋友已經大個都仲叫BB，其實唔緊要，但係唔好將三、四歲幼童當BB照顧吖！有位媽咪Share，見過一個兩、三歲小朋友嘅媽咪，唔畀小朋友學用杯飲奶同刷牙、識行都抱抱唔行得、朋友仔生日會有balloon唔畀去，全部原因都係「BB會怕怕～」世界上令人驚嘅事真係數都數唔哂，咩都用怕怕去解釋唔去試，咁要怕到幾多歲？
呢位「BB怕怕媽媽」亦都唔太鼓勵BB戒片，網民話呢位朋友：「試過去去下街，企喺度小便成身都係，又話BB怕怕；喺幼稚園坐喺度poo咗喺椅，佢讚小朋友好叻叻B，識同老師講叫工人抹抹！」我相信阿媽覺得叻係因為識叫工人姐姐抹…
Level 3: 唔該！老師餵埋我個女食飯吖～
講完BB講下小學生，有位網民提到，「記得有個女仔食得好慢，日日個個食晒佢都只係食少少，原來佢係屋企有人餵，無人餵就唔識食。家長曾經要求老師餵佢食飯…」
Level 4：中一生唔識用八達通，bodyguard貼身保護
中學生嘅自理能力同樣令人驚訝。有個Case係，學校宿營通告話係地鐵站7仔等，結果老師就被家長投訴：「點解會約呢啲地方，我個仔唔識用八達通，加上唔搭地鐵嘅，我司機會車佢去營地架喇！」同行仲有一班潛伏嘅bodyguard保護住少爺仔，佢一喊就會係草堆衝出黎！真係好有畫面！
Level 5：中學生唔識沖涼：姐姐會幫佢沖
有網民分享另一個古怪事件：「我以前話過一個同事，個仔1x歲，姐姐同佢沖涼，你有無諗過你同姐姐都有危險？而且都算係性騷擾？」呢位同事又醒喎，姐姐沖唔得？咁我叫老公返嚟同個仔沖囉～真係虧佢諗得出！
平衡返大家嘅心理先，有好多家長/老師都好在意唔想小朋友做港童，所以有人會同學生講：「讀書叻唔係大晒，生存到先係贏家！你係荒山野嶺，張靚靚成績表係幫唔到你活命嘅！」雖然呢位老師網民因此被投訴，但我就覺得佢講得好岩好正路！仲有位媽媽已經同個K3女講定，唔會同佢打電話返學校，要帶啲乜老師唔寫手册，自己記住靠自己！」要畀個讚佢！呢班細路過多十年八載就會出黎做嘢、拍拖結婚，班家長開始驚，要提醒定仔女唔好揀呢啲老公老婆！
