香港人有句說話叫「贏在起跑線」，除咗因為生活喺呢度啲人步伐夠晒急速之外，同時亦反映出呢個地方到底競爭有幾大，大到就連未出世都要計算住贏輸！作為父母忙於為子女安排學校，尋覓不同興趣班、補習班等等，將小朋友個時間表塞得密密麻麻，成為必然嘅事，而喺「塞進程」嘅過程之中，仲要考慮各方因素，好似話學咩先夠特別？跟邊個星級老師先有優勢？因為父母絕對唔想行錯一步，而耽誤咗小朋友嘅一生，每停一步，背後都可能有上百或者上千人跨過你！
為咗成人眼中「將來嘅快樂」，小朋友所謂嘅興趣，愈放愈後，家長教育子女想佢開開心心嘅初心，更加係跌咗入黑洞，還記得小朋友細細個陣，你只係想佢身體健康，有正確嘅價值觀嗎？
討論區熱話：個仔默書出貓 可以點同佢傾？
討論區熱話：阿仔做左件6299都覺得儍儍地的事，但我讚佢！
點解他條媽媽會有感而發？皆因呢幾日喺討論區睇到JM們教育小朋友時，分別遇嘅兩件事；首先，係大部份人都有經歷過嘅出貓被發現事件，媽媽收到老師電話之後，第一時間，就將責任歸究喺自己曾經同小朋友講：「今次默書一定要有80分！」他條媽媽就覺得其實出貓都有好多種原因，例如：人做我又做，又或者貪得意？所以媽媽又唔使過於自責，與此同時，亦可以參考下其他網友意見，以鼓勵代替責罵，借事件教識小朋友出貓、走捷徑唔係一定會有更理想嘅結果，即使無被老師發現，呢一份成果都唔係自己應該得到，更加唔會令你學習到新知識，雖然分數喺教育制度下係重要，但道德比分數更加重要！
「以後讚多D，出貓都可能恐懼失敗同冇自信。」
「小朋友仲細，道德觀同自律仍然發展緊，未明出貓嘅嚴重性！」
「學業成績係重要，但親子關係、仔女身心健康更重要！」
而另一方面，有媽媽就講到小朋友因為老師睇漏眼，而比咗滿分佢，最後小朋友選擇主動講出嚟，受到老師嘅讚賞！有呢份勇氣同誠實，確係唔容易，特別係對於大人，受住成長中利欲嘅薰陶，有著數嘅事，真係點會自己踢爆自己？就好似事件中，小朋友反被爺爺嫲嫲話佢呢個舉動太傻豬！
「分數幾多唔重要，最重要係有品德的人！」
「有啲基本價值觀，小孩子未必錯，唔好咩都以為自己啱晒。」
「我教書的時候試過有學生這樣做，不過我沒有扣他分，並表揚這是他誠實得來的獎賞！」
其實小朋友世界真係好簡單，而且黑白分明，好多時佢哋嘅決定，反而提醒返我哋應有嘅道德與價值觀，所以作為一個大人，更加應該懂得放低身段與既定思想，既然自己都唔係完美，咁要容納小朋友嘅「不滿分」都唔係太難啫，試下從錯誤中找出進步空間，喺出錯嘅過程中，累積一點成長經驗，調整正確價值觀，除咗係小朋友成長嘅階段，亦容許自己再次學習，找回初心。
討論區熱話：個仔默書出貓 可以點同佢傾？
討論區熱話：阿仔做左件6299都覺得儍儍地的事，但我讚佢！
