面對生離死別，從來都唔係一件容易嘅事，但逃避又係唔係好嘅方法呢？有啲父母可能會覺得仔女仲細，唔應該同佢哋探討呢啲比較敏感嘅話題，甚至覺得其實有咩好教，到時就自然識面對啦！
早幾日就有JM分享咗佢同囝囝嘅深情對話，講到生死，囝囝就話假若媽媽先死，可唔可以喺天堂門口等埋佢，到佢老咗，仲叫媽媽要記得接返佢，一起投胎，下世要再一齊過；聽到呢度，作為父母真係又感動又難捨，死亡係大家都避免唔到嘅事，咁如果自己或者有親人突然離開，又會對仔女造成咩影響呢？
「所以啲人信教幾好，死後喺天堂相見。」
「朋友老公病死咗，佢仔問朋友，爸爸點解會死。朋友話可能係天父對我哋嘅考驗，囝囝答佢可唔可以叫天父考驗第二個。」
「小朋友真係好天真，不過亦證明佢好錫你，我女都有同我講，我哋死都要一齊。」
「上個禮拜先同我仔講起下一世，阿仔都話想繼續做返我個仔，聽到好sweet，好開心個仔咁鍾意自己。」
討論區熱話：約定下世再見
討論區熱話：約定下世再見
不論係喺虛擬嘅卡通世界，甚至係現實中，我哋都經常會接觸到死亡呢個「事實」，有父母擔心傷害仔女幼小心靈，即使親人又或者寵物離世，都選擇以「避重就輕」方法，輕輕帶過就算，好似話往生者去咗「好遠嘅地方」、「遲啲會再見」等等，偏偏就無好好向小朋友灌輸正確嘅死亡認知，更莫講為佢哋建設好優質嘅心理狀況。
其實不同嘅家庭教育、信仰都會令小朋友對「死亡」有唔同嘅睇法，但不約而同嘅係「死亡」都係生命嘅一部分，只係應該點解令佢哋明白當中緣由呢？
記得有朋友分享過，佢嘅父母喺佢細個嘅時間，當家中嘅寵物離世之後，就會趁仔女唔為意嘅時間「打包」掉去垃圾房，就連好好道別嘅機會都無，呢個舉動無疑亦令朋友成長後，驚覺事實嘅一刻留下唔好嘅陰影，亦唔多唔少衍生咗對父母嘅埋怨，所以話，為小朋友「拒收」死亡訊息，其實真係絕對唔係好事！
鯊魚太覺得關於向小朋友灌輸死亡教育，首先係要由淺入深，用佢嘅語言，令佢明白死亡等於啲咩，好似話死咗之後，身體就唔會郁，已經無咗生命，亦唔會好似卡通入面嘅主角會復活，所以學懂珍惜比一切都嚟得重要；另外，切忌同小朋友形容死亡係去咗一個更好、無憂無慮嘅地方，令佢哋覺得死亡「好處」就係無痛苦、無煩惱，以至將來遇到挫折嘅時候，增加以尋死嚟解決問題嘅機會。
