2020-01-15

405

【從小學理財】小金錢大作用 打破「利是都係阿媽袋哂!」定律

新年又就快到喇,作為一個媽媽,除咗要準備派利是之外,都係時候諗下小朋友收到嘅利是錢應該點處理;回想返自己細個嗰陣,真係十個有九個小朋友都比阿媽全數充公,去到真係自己袋嘅年紀,都應該起碼上到中學,而聽得最多嘅相信係「阿媽幫你儲住先!」,至於儲儲下去咗邊,又或者實際儲咗幾多,相信都唔係好多人答得出!

不過時移世逆,呢個世代嘅阿媽似乎又有另一套處理子女利是錢嘅方法,好似最近就有JM們討論緊應該咩時候比小朋友自己運用利是錢,同時學習理財!

「每年都係俾2百元佢買野,其餘儲起。」

「見到個帖諗起我細個所有利是都係呀媽袋哂,從來冇比返過我!」

「全部我幫佢地洗晒!」

對於呢個問題,鯊魚太都充滿著疑問,講緊鯊寶得果三歲,最叻都係數到30嘅時候,又係咪適合同佢講理財呢?其實學習理財可以從淺入深,即使小朋友年紀仲細,都一樣可以同佢哋齊齊拆利是,認識唔同面額嘅貨幣,再學習點算幣值。

至於要小朋友理解金錢嘅運用,或者就要從「需要」入手,若然只係為咗滿足果下想買嘅衝動,呢個絕對唔係良好嘅理財基礎!

討論區熱話:幾多歲先比仔女自己運用利是錢?

無論係零用錢或者利是錢都好,都唔應該全數以單純滿足購買慾而作出消費,好似買玩具咁,小朋友有新梗係想買新咖啦,之不過如果屋企已經有相同或者性質相似嘅玩具,身為家長就應該「三思先買」,好好同小朋友解釋,千祈唔好心軟。鯊魚太覺得喺過程中,仲可以嘗試向小朋友說明錢嘅用途有好多,好似學習、購物或者先行儲起,留待遇到真正需要嘅物品或者情況,先再作出消費。

而講到利是錢嘅安排同運用,亦可以引導小朋友將利是錢好好分配,好似話用嚟備用、儲蓄、消費,甚至係捐獻,令佢哋開始接觸理財,初步實踐管理金錢嘅概念,唔會覺得錢就只係可以要嚟買嘢!

提到有父母會教導小朋友將部份金錢用捐獻用途,呢個舉動除咗可以幫到人之外,鯊魚太覺得都係一個唔錯嘅機會,等小朋友更投入去認識世界不同層面,幫助有需要嘅人,甚至係小動物。

討論區熱話:幾多歲先比仔女自己運用利是錢?

【編按:以上內容為作者之個人意見及立場】

相關文章

讓孩子學習運用優惠券的竅門

教孩子用利是錢計算機

【親子理財2020】利用新年利是錢 教導小孩用錢概念

心理學家解讀人生──開展小朋友教育的時機