同小朋友交談嘅期間，都會問下佢哋對於銀行戶口同埋紅簿仔嘅認識，有啲小朋友會好主動咁舉手話俾我聽佢銀行戶口有幾多錢，有啲雖然有零用錢，但每一次收到錢之後都會上繳俾媽咪，完全唔知道自己總共有幾多資產。
要教好理財嘅一大步就係要做好記賬，好多教小朋友理財嘅書籍都會提到，例如要按照日期將每一次收入、消費，都記錄喺收入支出表上面，但小編認為小朋友要做到呢一點唔難，難嘅係要佢哋知道記賬背後嘅原因，同埋記賬與理財規劃之間嘅關係。盲目咁記賬，啲錢有入無出，連自己有幾多總資產都唔清楚，其實對於理財冇乜幫助。
打個比喻，就好似去爬山咁，唔知道自己身處嘅位置距離目標有幾遠，沿途有幾多個休息站或者有啲乜嘢危險、陷阱，同埋辛苦付出之後嘅意義，淨係一味向前行，會好難先有動力撐到目的地。
呢個比喻同理財一樣，鼓勵小朋友記賬之前一定要同佢地一齊定立切實可行嘅短、中、長期儲蓄目標，跟住同佢地一齊傾下有啲乜嘢方法可以達到目標。
