2019-01-10

7.5K

你揀工 工揀你 你會點揀?

早前窮生喺自己既面書貼咗2個OFFER問大家投票會點揀,引起大家對咩先叫做好工既討論。睇返投票數字,結果都幾一面倒,而窮生今次就想以此為題同大家討論下點揀工!

先俾返少少背景資料:

OT成重點考慮因素

第一次先講最重要既一點,就係係今次投票我地睇得到,大部分人揀A既原因都係一句「唔洗OT」,可見OT對一般打工仔黎講係最憎既一份事黎。大家留意,文中冇人講過B會OT,只係話可能會有OT,已經憎成咁。你就見到大家幾乎一知道份工有機會OT已經唔想做,呢樣野冇話啱唔啱,純粹個人喜好,喺今時今日幾乎全民就業黎講,老細們要留人就應該好好參考呢個數據。

鬼佬公司嬴在起跑線

呢個都係另一個有趣既發現,就係唔係好多人Care做緊間公司大唔大,而香港人不嬲人鍾意鬼佬公司!只要老細係外國人,點都係睇高一線既!一聽到講資,仲係大公司,唔仆街又點會做到咁大呢?就會咁諗喇(真係慘)。冇錯既!係香港人一般印象,外國老細比較著重work life balance。係唔主張OT,而家佢地會覺得外資公司一般人工同福利較好,有得揀一定係鬼佬公司,以上兩點A都係完勝,自然90%以上網友都係揀左offer A啦!

沒有筍工,只有FIT工

係呢場投票既過程,窮生係專登唔回應,等大家去發表。好多人俾左好多答案同理由,呢D都係反映到網友自己既情況同心態。大家可能會問,如果係窮生,會點揀呢?事實就係,窮生會揀OFFER B。

我會留意到,有少數人會問好多前設問題,例如係故事主角幾多歲?情況係點?事實問呢D問題既人係聰明既,世界冇客觀既筍工,你見到近年好多新入職公務員都流失得好勁,你就明白。所以問題唔係揀邊份工,而係點解你會咁揀。客觀上其實2份工各有優點缺點,你揀邊份都唔可以話你錯,同人生一樣,做左決定冇得返轉頭,重點唔係你點揀,而家你有冇PLANNING FOR決定咗之後既路?

揀B的理由

首先,我唔係話大家揀A係錯。我只係話,如果我係佢,我會揀B。理由係睇原文主角其實只係比窮生大幾年,三十出頭左右。以一個事業準備起飛既人,除非見到果間細公司係好有希望幾年後發大,否則係大公司做一段日子對你日後轉工升職係有非常大好處。

另外係文中你隱隱會感覺到,主角唔係專業工種既人。所以佢會考慮做一份自己唔熟既工,但你留意,佢係話自己唔識物流,佢對此係並冇反感。如果相比起A,如果認為B行業發展比較好,請俾心機學習新事物,只有不停進步,求變既人先會KEEP得到自己既價值,先可以容易係工作之中搵到方向同興趣。當然我要多次強調,呢個只係窮生個人做既決定,唔代表揀A就錯。

完全沒有OT不是好事

大家之所以憎OT,係因為香港大多數公司的OT都是慣性,冇意義,冇效果。只係因為遲走感覺好似勤力D而遲走。但其實大家唔記得左OT既真正意思係應付生意上特殊情況,所以OT一定唔係經常出現,但一出現多數係好金,咁先係健康。事實上一間公司係完全唔洗OT,絕對唔係好事,因為OT代表左公司有OVERLOAD既情況,只有上升緊既公司先會耐不耐因為生意上升/特發情況先需要OT。尤其係細公司,人手一定冇大公司咁充裕,如果佢得幾條友做野,公司都好肯定唔洗你OT(假設佢冇呃你)咁間公司能夠發展既機會都唔大。除非你覺得你而家個數已經好夠,一世都係咁都冇問題。否則你30頭已經停左,日後要轉工唔係咁易。

老闆/工都不要輸打嬴要

窮生係次前既文章都有提過做老闆係點定人工,係Pay for job duties而唔係Pay for員工。呢下野唔緊要,但你始終唔可以set一份工出黎係令一個正常人冇辦法健康地工作,不停OT而no pay係典型趕走員工既動作。你難得請到個run得順既員工(其實真係好難),俾你攞到身彩你又使到盡,最後一定冇好下場。

而員工都一樣,好多人真係一心返工係呃飯食,當左自己係「臨時演員」,返工左出要出糧加人工。你自己都要諗下你做左幾多野,值唔值得出呢份人工先得。人係貪心的,一定係想做少d,搵多d。但係做少d係應該base on work smart而唔係no output。公司唔係善堂,冇老細會留d冇生產力既人係公司的。搵工要睇返自己需要,例如大家要work life balance,咁如果原本一個月20K,5天工作,返9放7(計埋OT),而家有份工一星期返4日(放星期六日和一至五揀一日)返10放5(我唔敢講完全冇OT,可能1-2個月1日 OT 2-3小時for緊急野)offer 14K大家會唔會覺得請大學生人工咁低冇良心?

【編按:以上內容為作者之個人意見及立場】

相關文章

緊貼新冠肺炎最新相關資訊