2019-05-23

7.6K

真正嘅人生正職係乜嘢?掌握個人財務自由

之前有單新聞寫 「35歲打工仔中年被裁 搵少七成勁悲觀」

其實大家唔好諗住唔關你事,因為呢個問題曾幾何時,我都覺得唔關自己事。當果日出現嘅時候,我先知道原來會如此的無助,如此的被動,當年曾經意氣風發嘅我,果刻就變成一隻死狗。有無人試過因為要供樓要養家,三日三夜瞓唔到,擔心份工,而你又好清楚你出番去未必搵到呢個人工?

我試過,我足足揸住部計數機三日三夜,點計點諗都計唔到條數,最終就迫咗我喺刀峰口上過活,踏入投資物業呢一個圈子。可能人人而家都話咁咪幾好,但我當其時確係被迫,先行呢條路,同埋點會無風險呀,講你都唔信。不過講番一樣嘢係,人到左3X歲時,你真係開始要諗清諗楚,你以後條路要點行,你唔會再可以好似2x歲咁逍遙自在,因為你開始會有負擔了。

呢個年紀,你要考慮下你人生果份正職了。有人問正職? 咪番緊工囉,你平日番緊果份工,係我來說呢份係叫做副業,即係兼職呀。咁正職係乜嘢?

其實正職就係如何去做一些事情去確保你將來可以財務自由,不受工資或工作嘅影響。咁呢個正職係乜? 喺我角度嚟講,我自己會係利用物業投資,租金作為我嘅被動收入,當物業去到一定年期時,可能就是沒按揭嘅同時,我就會有一堆資產,產生更加多嘅租金收入去幫我退休。我現在嘅被動收入已經大過我嘅洗費及固定支出,所以我已經是財務自由了,我現在基本上已經無番工了,而只係主力投資物業,搵筍盤,教下課程賺下飲茶錢,做一些自己鐘意做嘅野。

其實並非每人都會好似我咁利用物業,你可以利用基金,債券,股票,甚至乎生意都可以作為被動收入。每人興趣不同,我對物業嘅鐘情可能未必每人都一樣,有人會將幾樣嘢合起來去達到,所以大家唔需要去好特別去跟人點做,因為每人真的不同。

講咗咁耐被動收入來緣,其實係想話過你知,你打緊果份工,確係隨時可以唔要你,但如果你好似讀書咁真係將打工嘅正職當為人生正職的話,你可能最終真係會面對一個人生問題,就係中年失業,因為呢樣嘢唔係你可以掌握,你可以100%控制得到。所以我會說,人生嘅正職應該係如何將你現有的所有化成一堆被動收入去支撐你嘅下半生,呢個才是你嘅正職。

想吧? 有無諗過? 如果無諗過就要快喇,因為時間真係唔會等人,人生就係咁,無奈,殘酷,但呢個係事實。

【編按:以上內容為作者之個人意見及立場】

相關文章

樓盤傳真:比較沙田中心、好運中心、偉華中心(下)

緊貼新冠肺炎最新相關資訊