【理財個案】31歲　想進取一點

老師老師，我31歲，思考左好耐，想進取d，計劃如下，可給我小小意見嗎？

手上暫有
2手日清（1475）
2手美圖（1357）
2手長城 （2333）
1手褔壽園（1448）
以上股可以長渣嗎？

之前唔識投資，所以買左個儲蓄計劃，仲要供九年，每年要2萬

依嫁發覺回報真係太低....
如果取消計劃會唔會唔係太好？

另外，我手頭上有20萬現金，月入二萬，打算每月用一萬 投資股票，分配如下

$2000 盈富（2800）
$1000 比亞迪（1211）
$1000 銀娛 （027）
$1000 中生製藥 （1177）
合共月供：$5,000
這樣組合 會否太進取，定係只投資$5，000落盈富就ok ？

另外，每月五千儲起來，手上現金20萬 等股巿回落 慢慢再分段入優質股，如港交所，褔壽園，比亞迪，盈富，金沙。這樣可行嗎？目標想五年內有一百萬

個案重點：
‧31歲
‧現金$20萬
‧月入$20000

重點目標：
‧打算每月用$10000投資股票
‧如何將原有組合重組
‧5年有$100萬

龔成老師分析：

你31歲，財富仍有一定的增值能力，投資上可以進取一點，因為你仍有可承受風險的能力，只要在進取之餘，建立一個平衡組合就可以了。

現時持有的股票，都可以保持投資的，潛力股的比例雖然比較大，但由於總金額不算多，因此無問題，可長線。

至於儲蓄計劃，每年$2萬，以你的情況來說，又不算太多，一直供都可以的，就當時你財富分配中，防守的一部分。因為我地理財，要攻守兼備，小小地作防守，無問題的，但你就唔好預佢有乜回報。

月供股票的金額及分配，可以的。當中的分配適合，基本上已經可以開始進行，潛力股只佔$2000，不算進取，可以接受，甚至可以加多少少。記住，重點是長期月供，不要理會中短期股價。

至於餘下的資金，就可以等大市回落時，投資優質股，長線持有。

以現時的情況，都有相當的機會做到5年有$100萬。但如果要一定做到，你就要提升你的選股及投資技巧先得，所以，你要保持進行上述的計劃，努力儲蓄，投資，同時增加投資知識。