2019-02-28

6.7K

【讓股迷食指大動】貨源歸邊是咁的

貨源歸邊四個字,對於玩開股票的人,肯定食指大動,對於Baby Kingdom的讀者群來說,聽落好似一個高風險的同義詞,跟理財增值,似乎格格不入,但證監會都話,先求知後投資,既然這是市場的一部分,學咗無壞,若然日後有豬朋在旺市時彈個冧巴畀你,再留低貨源歸邊幾個字,起碼自己都可略作分析,避過陷阱嘛。

市場內財技不少,供股係其中一個加速令貨源歸邊的技倆,又可美其名集資發展新業務,所以每逢供股,好多炒友都睇實,點供法、幾時除凈、邊個包銷、供股結果及派送日期,當然就唔會得一套formula就知隻股玩唔玩得過,牽涉的因素太多,只能憑經驗及靠估。去年印象較深刻的是中國星(0326),0.25供股,遇上大市跌,嚇到冇股東敢跟,最後只得49%認購,向生咁樣供一供,持股就由20.63%升至51.86%,爽,你可能會話,仲有四成幾街貨唔算乾呱,但你睇吓由8月兩毫幾起步,年底升到0.97,沿途冇乜阻力,咁你話街貨多唔多呢?年底仲公佈派特別息0.15元,換言之當初如供股,現時成本只係一毫子,真係點沽都啖啖肉。

近期見唔少人都睇住隻華商海洋能源(0206),就係睇中佢從未供過股,58%供股,得六個股東申請,咁樣搞一搞真係乾晒喎,開個通告睇,唔計包銷商及關連人士的公眾股東,由供股前的32%減至16.34%。供完之後又的確炒過一浸的,由供股價0.45起步,都炒到0.66,但來得快去得快,最近已經連跌5天,跟供股價又好接近。

這股前稱TSC,2017年底賣殼予有招商局背景的基金,賣殼後原大股東仍會持有1.2億股,約8.15%股本,並承諾在認購協議完成後12個月不會減持,單刁完成日期是2018年2月9日,換言之早兩星期前已經解禁喇。再細心看月初的供股結果通告,招商局及中集這兩個一致行動人士都有供股,分別持51.94%及6.3%股份,但原大股東Global Energy就沒參與供股,仍持有當初的1.2億股,但百份比就由8.15%降至4.07%,按上市規則,低於5%持股,任何買賣都不需披露,即係話佢現在沽貨,都唔使話你知。

近日急回係唔係佢咃沽呀?咁又未必嘅,睇過CCASS數據,四大持股劵商分別是通海、摩根士丹利、國泰君安及匯豐,全部持超過1億股,通海係包銷商之一,而CCASS顯示供股前佢地得100萬股,咁應該唔係前大股東啦,大摩由原本持有9280萬,供股後多了9280萬股,比較易睇,就是中集囉,至於國泰君安及匯豐,在供股後股數沒明顯增多,即係冇供,有嫌疑是前大股東的根據地,但這兩間劵商在過去幾天都冇大手沽啊,反而最大手沽的是包銷商通海,可能只係有份供股的股東食糊而已。

雖則佢都算貨源乾,但潛在的沽壓也不少,日後如果見到1.2億股大手上板,又或者CCASS有異動,再入場都未遲,現時市場熱鬧又咁多機會,無需太早留意這類股份吧。

青冰 facebook個人專頁 請按

【編按:以上內容為作者之個人意見及立場】

相關文章

月薪嬌妻如何選擇ETF?

理財個案--年輕人炒股輸$10萬求翻身

理財個案--28歲3年上車!

月薪嬌妻應買入ETF收息嗎?

緊貼新冠肺炎最新相關資訊