有時有D新聞其實真係唔好睇咁多，大家會見到網絡上好多新聞，你點樣去分辨有無用? 我諗好多人都唔多識分。
就好似之前睇左個新聞節目，我唔明白點解D人成日要覺得6xx萬既樓先住得? 先可以見得下人，唔通全香港既人都要住6xx萬既樓? 大家又知唔知6xx萬係可以有好多好多選擇，三房單位都可以買到，又有幾多個香港人知道? 我有時聽到D年青人傾計，佢地竟然唔知有9成按揭，或者佢地會覺得買樓就差不多要俾一半或Full Paid，重有一D就一買樓就要係自己既Dream House，D年青人越聽得多越睇得多就一個傳一個。
新聞真係有好有壞，有D係一些唔正常既資訊黎，如果睇左D錯既新聞真係會害死D後生仔，因為後生仔會覺得無希望，連錢都唔儲，用晒佢就算，其實佢地唔明白，人生既希望就係要睇佢自己點樣去做，年青一代機會少左我都覺，但機會少左並唔代表要放棄，我都講想當年，我地無網絡，就只有靠自己去摸住石頭過河，但現在年青人基本上網絡資訊齊備，只要你想學的，跟本不難去學。我之前見過一個鬼佬竟然只係睇youtube去學一些財務上既野，久而久之，行出自己一條路，完成財務自由。如果你問我年青人一開始可以點樣做? 我會話一開始先由儲蓄做起，先養成習慣，控制洗費，之後就開始學一些基本既理財知識，其實學呢D野，真係上網都學得到，當然要自己嚴選下網站喇。資訊容易搵到，係好事亦會係壞事，因為有D係好，有D係壞，你要點識得去分? 總之如果收你錢既就全部自己小心小小了。
各位年青人，可能你真係覺得人生無希望，但記住，我都年青過，我都迷失過，我只可以對大家講，人生並唔係無希望，但如果你係諗住今朝有酒今朝醉，你將來既希望只會越來越少。
