2019-01-16

7.4K

阿爺私有化 無寶不落

前輩救落,市差私有化特別多,股價低殘,長期呈折讓的股份唔少,大股東本著「良心」驅使,用比賤價高一截的價錢私有化,仲可冠冕堂皇話畀大家一個機會套現,日後的難關由老細自己頂晒啦,你哋走先啦,但其實那個出價,可能是N年前上市價的一半甚至更低,小股東守咗多年都未見家鄉,但如投反對,股價又會打回原形,思前想後,最終只能含著淚投贊成票呀,就好似中外運航運(0368)咁。

港交所網站在成交數據及產品方面,都算好齊,不過甚麼全購及私有化的數字就欠奉,在證券市場季報內,雖有列出當季的除牌公司,但卻沒有清楚交代是勒令除牌還是私有化,所以青冰做功課,只能用人肉搜尋方式進行。

翻查由2012年至2018年的記錄,發現近年玩法已轉,2016年熔斷之災整年氣氛唔好,私有化有10宗,不過2017年大旺市,竟有14宗,個細節位係,那年是新經濟股當道,資金湧晒去那邊,舊經濟股雖然低估值,但業務唔夠性感,長期冇人玩自然價殘,大股東如果睇好行業前景,趁市場未留意到就先行出手,平價退市。

私有化個案中,成功率是相當高, 2014年成功率67%,已屬最低,2013年及2016年更是全部成功,12年至18年間55宗,有45宗係成功的,成功率有81%,最有趣的是,這七年裡面,阿爺9度出手私有化H股,全部凱旋而歸,簡直係鳳凰手無寶不落。

10宗失敗個案,新世界中國在14年首度私有化失敗,電能(0006)在15年,新世界百貨(0825)在17年,仲有去年台資的寶勝(3813),馬來西亞華人郭令燦兩度私有化國浩(0053)失敗,合共六次。老牌華資股真係好難玩,唔會善待股東,到私有化出價時,就比較孤寒,明顯冇志在必得之心,可能佢哋心諗,今次唔得咪下次囉,不過,阿爺出手私有化,叫做係用是公家錢,出手豪爽係理所當然,因為阿爺要的是結果,不會計較成本。

現時私有化進行中的有三隻股份,撇除星期五投票的先進半導體(3355)外,現時仲未發私有化通函及安排股東大會投票的,分別是合和(0054)及哈爾濱電氣(1133),兩者剛好來自以上兩大陣營,同樣距離私有化價格逾一成,照數據及牌面,似乎係後者較值博,不過H股私有化雖然全部成功,但時間偏差好大,快嘅好似物美咁,由公佈到除牌,3個月就搞掂,慢嘅天大管材就要拖足10個月。另外,根據中國法律及H股公司章程,要約人係無權強制收購冇接受要約的股份,換言之H股股東冇接受私有化,在H股撤銷上市地位後,係會揸住非上市證券。

另一有趣發現,就是在人肉搜尋時,發現有些上市編號,已經私有化退市兩次,例如即將退市的中外運航運(0368),以前用這冧巴的是吉林化工,而上市編號331,就有春天百貨及華潤萬眾電話用過。

今次這篇都花了很多時間去人肉搜集資料,同港交所披露易網站搏鬥,如果覺得OK,可以去青冰的fb專頁畀個like支持下啦。

【編按:以上內容為作者之個人意見及立場】

相關文章

月薪嬌妻如何選擇ETF?

理財個案--年輕人炒股輸$10萬求翻身

理財個案--28歲3年上車!

月薪嬌妻應買入ETF收息嗎?

緊貼新冠肺炎最新相關資訊