2018-10-24

3K

一二手樓真的跌市了嗎?

繼續係樓淡劈劈劈的年代,報紙上面日日都係劈劈劈或者撻撻撻,樓淡大軍當然搖旗納喊,享受勝利者的姿態,而林鄭硬推填海更加意味長遠會有一個願景係有無窮無盡的供應,如此一來加上杜指升下跌下港股繼續慢熊向下沉,樓市向下尋底的市況好似相當明顯。

當然,之前隊長亦講過一手樓銷售已經係將所有客源盡谷過去而令二手非常死寂係是次跌市的主因,而呢家一手樓銷情都十分緩慢,如九建油溏賣得44 (130伙),LP6第三四輪已經慢晒,上源就撻定潮,呢家大西北又黎玩幾個盤搶客,當中朗城薈係正西鐵站隔離,目前先收千票,究竟呢一堆新樓潮又點拆解呢?

需知到,其實油溏個盤位置吊腳交通同生活配套差都係明顯的,上源其實都係承襲同一問題而且可能仲差多二錢重,當然市況大旺就有機會一Q清,但市淡下D買家變番理性小小去唔到貨,而的確又唔係話平過人,講真銷情淡隊長認為真係唔可以當係指標。LP6黎講,其實衰衰地都已經賣左幾百間套現過百億,咁的市況下你推成千個盤出黎,而且係康城站即將軍澳最入的地段,都算係有所交待啦?

然而,而家反而最值得關注的一定係朗城薈,始終呢個盤有Grand Yoho的概念,真正30秒上西鐵交通一流配套一流,開價隊長我認同係進取中帶點克制,老實講3分鐘可到番Grand Yoho Mall,呢個盤本身的位置質素同開價,理論上都相當異常吸引成條大西北戰線,如果你係大西北人仕你就明白呢個幾乎係西鐵站最後一個新樓可以咁近地鐵得黎又咁好配套,所以如果呢個盤能夠大賣的話,對市場真係有指標作用。但帶番個頭盔,其實去到8成貨亦叫做唔錯啦,但如果賣得一半咁話呢,大家就真係要好有戒心樓市個底真係好弱好弱。

但係弱還弱,之前隊長講過地產佬還招一定唔係傻,賣完手頭上的野就會開始減慢推盤,空倉或低持倉過渡房策是肯定必然的反應,因此你見到山頂地王流標係近幾年的首次已經係一個警號,當然呢個山頂地王推出黎的地同樓都唔會係比普通人買架啦,不過300億左右的地價再連起樓成本,咁大舊野係呢家咁的市況下政府搞地產商迫佢地買樓就可想而知呢,係一件非常愚蠢的事,試問你如果個地產商楂莊果位,見到今日咁的市況你仲會唔會黎玩咁大投資食幾百億上身坐幾年? 個政策咁的風向,咪玩啦,揸住舊cash唧下牙膏咁賣樓好過啦。

講番二手,可能你會係報紙見到劈劈劈的情況,之但係呢,最近比你去地產鋪其實又係咩情況先?減價劈價盤你想睇?賣左啦。是的,呢個就係地產代理引你入去問下野吸下的招數。的確有D時間呢,係可能有個別業主輸股票等錢洗堅劈落黎,但係呢D盤可以話相對真係好少,少到你行成日都唔會遇到,更加唔會有屍骸遍野的感覺,而最大的感覺係你行完,然後就會有AA同你講不如買新樓啦咁,因為的確優質而又平的,係無乜。唔信,你可以打開各大成交網,睇下近期的成交量多唔多,而個價錢又係點?好多屋苑,就係成交果一兩間平左D的,又或者係成3-5間都係市價稍平DD,但係有間零舍平的呢,就會被大肆報導,但其實呢D成交平時一路都會有,始終各有各故事,有D單位質素差,死過人,等錢洗,唔知,但全面性的劈劈劈呢,以隊長過去兩星期的市場消息,睇唔到。

其實香港人真係已經上左好多課,所以先見到點解樓市都比較硬淨,無他的,97年07年洗禮過,樓市又係升。沙士咁惡劣又試過,之後又係升。15年跌2-3成落去之後呢,又係升。歷史教訓左好多業主,每次乜野大災大難後,只要捱得過果一刻市況,都係要升。所以關鍵的,係你捱唔捱得住,而捱唔得住,就要香港經濟崩塌先得,但以香港呢一刻黎講,你唔買股票無損傷的話,全民就業,底子又厚,跌同調整,似乎都係言之尚早,捱下價就必定的,等到出年一二月,市況相信應該會好轉。

【編按:以上內容為作者之個人意見及立場】

相關文章

新手睇樓唔想做「水魚」事前有咩準備?實戰心得分享(一)

【婆媳相處難】未過門先被未來奶奶索家用 迫做家務禁進修:一齊住真係唔想結婚

理財個案--28歲3年上車!

【新施政報告】800萬物業可做9成按揭?是危是機?

緊貼新冠肺炎最新相關資訊