2020-03-19

4.6K

【JM有話兒】老公唔係自己最愛嘅男人 莫非係為嫁而嫁?

愛情同婚姻到底係同一件事定要分開嚟睇?其實從細到大都經常都會聽到人講:「最後嗰個,往往唔係最愛嗰個!」,聽落去有人會覺得好荒謬,質疑如果唔係最鍾意的話,又做咩要結婚;有人又會覺得好正常,因為細細個追尋嘅愛情根本無包袱,浪漫行先自然更深刻,但人大咗就要諗下理想同現實,令愛情變質?

最近就有JM有感而發,問大家最愛嘅男人係唔係自己老公,仲話自己最愛嗰個其實係前男友!?講到呢度有唔少JM都會話仔女先係最愛,連Juicy媽都不禁地問下自已,最愛嘅男人?係阿仔定老公?咁係咪要將個老公掉去大西洋?

阿仔、阿女無疑係呢個史上最強嘅小三,要花上無限心血去栽種嘅小幼苗,但愛情同親情好似唔可以拉埋一齊講,Juicy媽就覺得總要分清楚,仔女應該定位為需要照顧嘅人,但總有一日,佢哋都會有自己嘅家庭,而老公先係同自己終老嘅人!

討論區熱話:有無JM最愛的男人不是老公?

討論區熱話:有無JM最愛的男人不是老公?

而撇除仔女去講,咁大家最愛嘅男人又係咪你老公?似乎就係一理智與感情嘅鬥爭!

「我最愛嘅人係我老公,唔係最愛點解要嫁!」

「揀得佢做老公,即係覺得呢個係可以一齊過日子嘅人。有幾愛同係咪做到人世係兩件事。更愛都好,嗌交多過食飯咪又係辛苦!」

「結婚唔代表係最愛,只是在適婚年齡時遇到適合結婚的人,可能是愛情與麵包的抉擇,尤其是現今的港女都係講實際。」

仲有JM搞笑地形容C6係佢一生人最憎、最恨嘅男人,所以成日都同對方講,要用一生去折磨同摧毀佢,要睇住C6點樣俾自己折磨至老死,求生不得求死不能,聽落就知咩係「有幾愛就有幾恨」,打者愛也都係咁嘅理論啫,最緊要係呢位被折磨同摧毀嘅C6聽得高興又滿足,咁先叫絕配嘛!

所以Juicy媽就覺得,與其成日回首搵最愛,倒不如珍惜眼前嗰件,欣賞下彼此嘅獨特之處,難度平淡過後,細水長流就唔可以成為最愛?你估依家真係拍緊韓劇咩!一段健康嘅關係中,最適合同最愛絕對有共存空間,最重要都係要知道自己想要咩,愛情同麵包並唔係二揀一題目,而且人心肉做,一日未死,一日都仲可以改變,話唔定總有一日中年發福嘅C6都會成為你嘅最愛呢!

【編按:以上內容為作者之個人意見及立場】

相關文章

奉子成婚+雞同鴨講咁嘅婚姻注定無將來?網民:了解完都要識相輔相成!

幾時生B都要被99操控?網民:呢個年代仲要追仔 真係唔通氣!

結婚前傾傾先,婚前輔導5要點締結和諧婚姻

點樣應對「拖延症老公」?

緊貼新冠肺炎最新相關資訊