話說鍾欣桐（阿嬌）早前就同有「醫界王陽明」之稱嘅賴弘國（Michael）拉埋天窗，仲喺香港舉行咗場盛大婚禮，除咗想同佢講聲恭喜之外，Juicy媽同記者朋友一樣都好想八下，年屆37歲嘅阿嬌會唔會生BB？
對於呢個問題，阿嬌當時就甜到漏咁轉身射個三分波，呀唔係，係轉身用國語問老公：「你能幫我懷孕嗎？」，而Michael亦即時回應太太畀佢嘅重任：「我都想。」；講到代老婆佗B，其實真係講就容易，就算唔計生產階段嘅10級痛，女性喺佗B過程都已經夠晒痛苦。除咗會因為賀爾蒙改變，導致情緒失衡，有啲產婦仲要面對嚴重害喜反應，身型轉變等等問題，連食嘢都要嚴重戒口，真係諗起都想喊！
有種痛，係只有生過仔先明白嘅痛，更加唔係人人可以體諒嘅痛。而喺呢啲時候就硬係有啲鍾意唱反調嘅姨媽姑姐彈出嚟，Juicy媽就試過佗B嗰陣，老公細心少少撐扶下，都有說話聽。比個都唔知咩輩份嘅親戚話：「佗個仔啫！有幾辛苦呀，使唔使咁誇張！」，嗰刻真係只回應一句：「哈哈哈！」
作為一個孕婦下下面對住四方八面、裡裡外外嘅猛烈攻擊，都真係唔係講笑，所以話，各位男士們真係要好好愛惜嗰個肯為你生BB嘅另一半，做阿媽真係好偉大架！
