無性婚姻=婚姻破裂？

老老實實，生咗小朋友之後冇乜心情親熱都好正常。幾經辛苦氹到個細路哥瞓覺，都唔敢咁大聲嘈醒佢。又怕進行到一半細路嗌爸爸媽媽。講真係好冇mood，直頭好似做賊咁。

最近開始喺forum見到唔少人提起「無性婚姻」呢個詞彙，聽落幾有型咁。有啲人話正常喎，香港呢個地方，從來唔適合風花雪月。搵食同湊仔唔夠攰咩？夜晚早啲瞓好過啦，做嚟好似交功課咁都冇意思。都有人話「有啲人真係覺得性係可有可無，愛唔一定由性去表現，唔好迫佢啦。」

另一邊廂，好多人覺得兩公婆行埋係維繫感情嘅方式。如果冇親密接觸，容乜易變成同屋主，貌合又神離......無性婚姻其實咪即係關係出現問題，但又唔想面對所以作出嚟安慰自己。

我咁覺得啦，有性唔代表美滿婚姻，冇性都唔等於婚姻破裂嘅。當然喺大家都舒服嘅環境之下，增進吓感情係好事。間唔時去旅行或者過下二人世界，搵返拍拖嘅感覺，好過日日對住屋企四面牆諗婚姻有冇性先work。

即刻入嚟討論區一齊傾