人生在世，雖然話每個人都係獨立個體，之不過同時間一個人又有好多身份，就咁講唔多明？即係話你既會係人哋個仔，同時又會係人哋個孫，結咗婚之後，你仲會兼任人哋老公，如果有生育計劃，你仲會係人哋老竇，將來有機會成為別人外父或者老爺，但你又係唔係每個身份都做得好好呢？相反嚟講，咁又點先叫好？
經常都聽到有人話婚姻耐咗，彼此之間就會無咗愛呢樣嘢，極其量只係習慣一齊生活，聽到呢度Juicy媽真係有啲勞氣，如果係咁，為咩要有婚姻？同搵條繩縛住兩個人，直至死又有咩分別？有啲人以為自己好偉大，作出嘅所有忍受都係只為完整一頭家，從來無真正接受另一半，成日話死忍東、死忍西，唔通你係完美？另一半又完全無接受你嘅缺點？口講話忍，但終日就黑口黑面對住屋企人，噢！莫非咁又叫做完整咩？小朋友終有一日會長大，隨住歲月，佢會明白到有啲家庭成員根本人在心不在，單向嘅自我認為好偉大，根本係多餘，對於子女嚟講，更加可能係一個又一個大話，其實咁又何苦？
對於有JM呻老公唔合格，只係盡咗做父親嘅責任，老老實實無人完美，其實人與人之間最重要都係溝通，搵大家共存嘅位置，其他JM都話總有方法搞搞佢：「又或者一齊建立共同興趣，咁會多啲話題」、「結婚就係咁，無可能搵到個100%滿意的。」、「好好同佢講你嘅睇法，等佢再做好啲表現。」
總括而言，兩夫妻有咩不滿，最忌就係死忍，因為點忍都好，最後都有一日會爆，分開唔一定係錯，唔一定係最差嘅決定，只係唔好經常搵頭家做借口！唔通到忍唔住嗰刻就叫做盡咗力？到仔女大咗就係分開嘅時候？要自己睇住父母分開，相信係幾多歲都唔會係容易接受嘅事！對於有啲口口聲聲為頭家嘅人，Juicy媽真係極度鄙視，好心唔好講到自己好偉大，為咗頭家乜乜乜，講到底係為咗自己面子，定怕親朋戚友說三道四，你自己最清楚！
