照顧屋企無時間理自己，啲紋慢慢就會走出黎。自己留意到咪勤力保養囉，最怕係聽到有人「提醒」：「咁唔好睇呀，不如得閒去整整佢啦，你睇下阿我同事keep得幾好。」有網民分享佢老公唔知佢隨口講定有心咁講咗以上一番說話！
第一個嬲位就當然做咩叫樓主整容先！而家好失禮你咩，講到出口？！不過有好多回覆就話，無所謂啦，做下facial又好醫學美容又好，咪對自己好啲囉。最重要係可以入死佬數，叫佢埋單有著數！第二個嬲位係，竟然搵樓主同同事比較，呢句真係好令人介意，女人最怕比較，仲要係搵自己老婆同其他日對夜對嘅女同事比，真係好令人懷疑！
不過係講錢之前，係唔係應該諗下老公做咩無啦啦會咁樣講。係人都知，話女人殘啊、老啊，呢啲說話簡直係自尋死路，有咩驅使佢冒死講呢番說話呢？有網民擔心「佢可能觀察咗好耐先忍唔住咁講」，即係樓主已經殘到一個忍受唔到嘅地步！所以唔好錯重點，邊個畀錢都好啦，如果樓主自己都介意就處理一下！
不過我就覺得，衰老係好正常嘅事，但老同殘又係兩回事。有幾個小動作各位媽咪可以留意下自己會唔會做咗都唔知，避免因為不良習慣而令皺紋走出黎！
低頭玩電話：低頭族族人必定有嘅記號--頸紋，因為一玩起電話上黎碌下碌下又一個鐘，條頸長期受壓以形成頸紋，因為玩電話而出頸紋好唔抵啫！
皺眉頭：諗起阿仔啲成績，就皺哂眉頭喇….擔心還擔心，控制一下唔好長期皺眉，皺眉時眉心肌肉收縮就會容易形成皺紋。
托腮：托腮嘅動作千萬唔好太大力，因為年紀大，皮膚無咁有彈性同唔夠水份，再擠壓皮膚就好易會有乾紋！
