以前就話重男輕女，而家似乎係倒返轉，啲老公恨女恨到出晒面。啲人話囡囡係爸爸前世情人，睇吓碧咸、張繼聰同陳豪呢啲星爸就知啦。抱起個女即刻變得情深款款，好冧呀！
有媽媽分享話，老公一直渴望有個囡囡、囝囝又好想有個妹妹，卒之最後如願以償。囡囡識扮可愛又識扮可憐，令到兩仔爺愛不釋手，日日都被氹得好開心！另外一家嘅兩個哥哥被妹妹打完仲識笑，爭住叫妹妹騎膊馬，老公日日攬住個女嚟錫，媽媽慨嘆，自己唔夠囡囡年輕可愛，冇啦冇得爭架啦。
好多人都話囝囝大個咗要擔起頭家，要管教得嚴厲啲；囡囡都要教好，但要錫同富養，等佢哋大個唔會輕易被物質吸引。最搞笑係啲爸爸明顯大細超，對住囝囝粗聲粗氣；對住囡囡就陰聲細氣。有啲仲甘願做牛做馬，一個大男人伏喺地下畀個女騎！
聽到呢啲傻瓜爸爸事蹟真係覺得好搞笑，又幾可愛，希望啲囝囝唔會懷疑自己係咪親生啦。有媽媽就講得啱啦，有啲老公都係事後孔明。生咗仔仔，就覺得仔玩得埋；生咗女，又覺得囡囡嗲啲好sweet。其實每個小天使來臨都係緣份，仔女都一樣咁好啦！
