TVB新劇《BB來了》真係睇到一班媽媽勁有共鳴，Ali飾演嘅青春靚太，生咗BB事業身材咩都唔同哂，討論區班靚媽都覺得講中哂自己心聲！但睇陳秀珠做外母同奶奶盧宛茵，兩對親家大鬥法都勁好睇！劇情輕鬆之餘其實真心貼地，特別係有網民出Post講，第二集劇情陳秀珠講咗句「女人有外家返先矜貴呀！」，見到珠姐咁錫個女驚佢被奶奶蝦，默默喺背後做咗好多嘢，真係感動到眼濕濕…
「有外家撐 人哋唔會睇你唔起！」
結咗婚做咗人老婆先知，阿媽係世界上最好，有網民就提到，有阿媽撐腰做最強後盾，奶奶點都會畀返幾分薄面：「冇外家撐係爭少少㗎。人哋會睇你唔起蝦你。」兩公婆有拗撬就真係少不免，有時想搵個地方行開下抖下氣，都會即刻諗到想返娘家，始終有阿爸阿媽傾下，特別係同老公冷戰個陣，成日困住同一個空間真係好辛苦！有幾位好幸福嘅媽媽就提到就算自己嫁左，阿媽都依然keep住間房畀佢等佢隨時返黎，當然無人想嗌交嗌到返外家，但知道爸爸媽媽咁維護自己，真係好窩心。
「老豆當我係掌上明珠」
睇《BB來了》睇到好Sweet，睇埋網民真實留言其實更加感動！有個網民提到老豆好錫自己，第一次見當時男朋友已經講：「有咩事返屋企，老豆係到。」；老豆第一次見6299，就講：「我最錫呢個女，佢係出面有咩事，我叫佢唔使擔心，返來屋企，老豆係到。」「有外家撐，不單矜貴，連62，99，C6都會驚驚地！」爸爸呢番說話，阿女咁感動一定會記一生，6299都一定會記住....
「我都要做阿女最強後盾！」
不過都有媽媽睇完之後覺得酸溜溜，因為不是每個女人都有外家support！有幾位網民提到，自己一嫁，娘家已經諗緊點樣處理佢間房，即係唔使旨意有咩事可以返黎住…所以佢哋都話，雖然無娘家撐，但第時阿女嫁咗人，我都一樣會保護佢，唔畀奶奶蝦佢！不過計我話就唔好講到個個奶奶都好似劇中盧宛茵咁惡頂先得架！
圖片來源：TVB《BB來了》截圖
