打完齋唔要和尚？BB大咗新抱煩惱點請走奶奶

事緣喺forum有新抱話，個仔出世時工人姐姐仲未上手，所以請奶奶同住幫手睇小朋友。而家過咗一年工人姐姐有能力照顧小朋友喇，就煩惱緊點請奶奶返自己屋企住。部份網民覺得樓主十足十打完齋唔要和尚，當奶奶工人咁呼之則來、揮之則去。

但Juicy媽又唔覺喎，當初奶奶過嚟幫手時你情我願，最大問題係冇講好住幾耐啫。請人幫手唔包同住一世架嘛，一般而言湊細路仔都只係一段時間，冇理由搞到奶奶同老爺一世分居喎。不過最驚奶奶誤會咗係想佢無限期咁住，而家咪會覺得畀人「?完鬆」囉。

網民提議用比較委婉嘅方法表達，例如請奶奶同老爺去一轉旅行，話多謝一路以嚟奶奶嘅幫忙，請佢返屋企同老爺準備一齊出發。又例如大裝修間屋，順勢全部人搬返奶奶家，裝修之後冇再多間房，奶奶要過夜就叫老公瞓廳讓張床畀佢，希望奶奶會知難而退。或者同奶奶講老爺好鬼寂寞，快啲返去mark實老爺免得佢行差踏錯，直接叫老爺幫手氹返老婆返去又得。

雖然網民嘅建議睇落搞gag居多，不過重點就係新抱出聲就一定死架喇，大家都叫樓主千祈唔好做傻事。一係搵老公出面講，唔好令自己變千古罪人。

有人覺得新抱自私，都有網民話奶奶要識做，結咗婚就要畀個仔一家一主，唔好咁唔通氣。我覺得有人講得最公道：新抱應該設身處地咁諗，自己做咗奶奶之後聽到咩說話會覺得傷心，諗清楚先行動同開口囉，因為他朝君體也相同呀嘛。

入去討論區一齊傾