近排有位親人入醫院，我去探病時，見到去探病嘅都係女士居多，大多數都會好細心留意老人家既需要，令我突然諗起養兒防老嗰啲老土嘢，我都知咁諗唔合時宜，但換轉喺病床嘅係我，照顧我嘅會係阿仔，佢會唔會一樣咁細心照顧我呢？當時真係愈諗愈多，愈諗愈擔心…
以前想有個女嘅原因，除咗因為女乖啲，聽話啲，其實都仲有少少私心…自己做女，都自問對家中老人家的大小事務上心，C6唔係唔關心父母，只係粗枝大葉，叫佢帶長老覆診都預咗會帶漏嘢…
不過好彩，我睇到呢個post嘅網民分享（連結：http://bit.ly/2FPDE12），就無再鑽牛角尖。原來有位生極都係仔嘅媽咪同我一樣都有擔心自己老咗點算，覺得好似有個女照顧自己好啲。其他JM就覺得仔女都係自己嘅，性格係點自己最清楚，無話一定女就細心，仔就粗心嘅。加上，照顧自己都係自己嘅責任，唔好講錢銀，淨係講到keep住做運動已經算係對自己嘅健康負責任啦；仲有就係儲定個錢，仔女都有自己嘅人生，有起咩事上黎，都唔好麻煩都身邊人就已經好足夠。
講到咁長遠嘅事，真係無人會意料到，唯一可以做嘅，不如今晚食完飯，同埋阿仔落街行下，做下運動好過啦！
