2018-11-26

4.8K

【卓林娶加藉女友】如果我係吳綺莉......

碌碌下forum,見到有姊妹話卓林娶咗加藉女友Audi,唔知吳綺莉會點諗!之前睇過報導,吳綺莉講過類似「家中大門會永遠為你打開」嘅說話。但而家個女帶個老婆返嚟,仲會唔會畀佢「攜眷」入屋企大門先?

今次就唔係講咩八掛是非,係認真討論吓件事。大家都為人父母,捫心自問,如果仔女揀條非「主流」嘅路,自己係咪可以無條件接受同支持呢?

先旨聲明,Juicy媽就好open,能夠接受同性戀嘅。咁如果叫我呢一刻想像自己個仔係gay係有啲難嘅,不過煮到埋嚟就要食架喇。唔通真係要做到韓劇咁「你同佢一齊就同你斷絕關係」咩。性向唔係問題,最緊要潔身自愛、從一而終,做阿媽嘅都盼細路過得開心架嘛。

可能你會話,講就容易啫,針唔拮到肉唔知痛。咁又係嘅,老實講,無論自己後生時幾敢作敢為,生兒育女後都想佢將來嘅路平平坦坦。最好就同普羅大眾一樣結婚生仔,下一代又結婚生仔咁,唔好搞咁多咁多嘢喇。

不過仔女嘅人生,又點到老豆老母話事吖。仔女識諗嘅,佢帶老婆定老公返嚟我都唔介意。相反,唔生性等我養嘅,連佢本人我都唔歡迎呀!

入嚟討論區一齊傾

【編按:以上內容為作者之個人意見及立場】

相關文章

緊貼新冠肺炎最新相關資訊