2020-01-17

2.8K

【家長反思】JM六句肺腑之言:你希望孩子用童年治癒一生,還是用一生治癒童年?

沒有人天生就懂得當父母,大家都是在與子女的周旋角力中,跌跌撞撞地學習怎樣當個好爸爸、好媽媽。然而,來自親朋戚友、教育制度等各方面的壓力接踵而來,我們很容易忘了初為父母的初衷,其實只是想子女健康快樂地成長。

有媽媽就以自身的經歷為例子,在討論區上分享了6句勸世良言,希望勸勉天下父母勿忘初衷:

討論區原文:想同各位爸爸媽媽講嘅說話... 


我成長喺一個唔係好健康嘅家庭,以下係我想同各位爸爸媽媽講嘅說話……
可能有啲長,希望大家耐心睇完。

1. 小朋友好需要你嘅欣賞去建立自信心,並學識欣賞自己。

將來社會上會有無數批評同指責佢嘅人,佢唔需要咁早就經歷呢一切,
佢需要你嘅欣賞嚟建立將來面對殘酷社會嘅保護網

2. 你可能已經忘記咗小時候嘅你。

加數減數對現在嘅你嚟講當然好容易,但對於小朋友發展中嘅腦袋嚟講,每一樣看似簡單嘅嘢都需要學習,請你喺佢做錯時唔好太炆,畀佢知道錯唔緊要,爸爸媽媽會陪住佢。到佢腦袋發展到某個位,佢總有一日會學識,不是嗎?

3. 關係破壞咗,即使修補都永遠有個裂痕。

即使幾嬲都好,唔好講傷害性嘅說話(e.g. 點解你咁蠢),
亦唔好打小朋友,要打用手打(佢有幾痛你又有幾痛),亦唔好打面。
街外嘅人令你嬲,你都唔會去傷害佢,咁點解你會選擇傷害自己嘅小朋友?
為教佢定為發洩?我教你煮飯,你忘記步驟/態度差,我打你得唔得?

4. 小朋友對你嘅情緒好敏感,能夠氹到你開心係佢哋最大嘅成就。

亦因為咁,作為大人嘅你要好好照顧自己,盡量避免將外面嘅包袱帶回屋企,
同時你亦可以考慮坦白同小朋友講(e.g. 媽媽今日工作有啲唔開心,所以想休息下,同唔到你玩)。唔好以為你唔講,小朋友就唔知道,你嘅情緒係直接影響緊佢嘅情緒。

5. 無論點,小朋友都係無條件地愛佢嘅爸爸媽媽。

同樣地,希望你都可以比小朋友感受到你係無條件地愛佢,唔係要幾叻幾乖先錫。

6. 最後,你希望小朋友將來用童年治癒一生,還是用一生治癒童年?

It's easier to build a strong child than to repair a broken man(Frederick Douglass)


討論區原文:想同各位爸爸媽媽講嘅說話... 

作為別人的女兒、孩子的母親,看畢全文後,真的感動得眼濕濕……

我們為人父母者,回想迎接寶寶來到世上的一刻,看着那小小的身軀、尤如天使般的面孔,內心都不禁許下承諾:孩子,爸爸媽媽一定盡力為你提供最好,希望你能夠快樂地成長。

然而,不知為何,隨着孩子開始牙牙學語,慢慢有主見,到開始上幼稚園後,父母和子女間的對話彷彿只剩下「點解你咁唔聽話?」、「你再係咁媽媽唔要你!」等充滿傷害的說話……各位爸媽,到底是甚麼令我們忘了當初對寶寶許下的承諾?

許多父母看到樓主的肺腑之言後,紛紛留言表達同感與謝意:

「我嘅原生家庭都好唔健康,我都唔識欣賞自己,充滿無力感,希望我可以喺我仔女身上彌補呢一切」。
「講得好好,差點忘記了生兒育女的初心。」
「好同意你所分享嘅嘢,我都努力做好自己的角色。」

小朋友能否健康快樂地長大成人,其實就取決於原生家庭是否健康快樂,這幾句真摯分享,實在相當值得父母深切反思,銘記於心。

為人父母的路不易走,但如果一直緊記初心,或許就沒那麼容易偏離航道。各位爸媽,共勉之。

【編按:以上內容為作者之個人意見及立場】

相關文章

小二女堅拒當舞台劇主角 反鍾情扮樹 媽媽震怒罷看表演惹網民批評

【無賴媽】遲到2分鐘無法登機 媽媽大鬧機場:趕住返去餵奶呀!

【每天都是新手父母】孩子才是我們最好的教養小老師

【獨留在家】2歲男童偷拿菜刀模仿大人做菜 意外切斷大拇指

緊貼新冠肺炎最新相關資訊