2020-07-20

638

【教育方程式】千辛萬苦為仔女鋪路入名校 為嘅只係「名牌光環」?

喺香港嘅家長世界入面,聽人呻為咗仔女入咩學校而勞心勞力,可以話係家常便飯,由幼稚園到小學,由小學到中學,面試、求位、叩門... 真係聽到都覺得累!

唔講仲以為香港連學位都唔夠!而事實上,各位緊張家長爭崩頭都係想為仔女搵間「好學校」,咁咩先為知好學校呢?入到傳統名校係真係為仔女好,定係只係為咗自己臉子,講出嚟證明自己仔女又幾醒,又幾威威豬?

最近就有JM分享同事仔女成功入到傳統名校嘅嗰份喜悅,大家都紛紛發表對於「入名校」嘅睇法,講到作為家長嘅付出,分分鐘仲勤力過真正讀嗰個,更有個極端例子,話見過人曾經為咗要仔女入到名校,除咗不斷學嘢,仲為仔女建立人際網絡,嚴選中產或以上朋友,腦裡面淨係諗點樣令仔女成材,最後連自己份工都忽略埋,畀人炒魷魚,生活開支變得極大,受唔住壓力有情緒病!莫非子女成材比健康更重要?

「有啲人出盡九牛二虎之力都入唔到,有啲人係咁咦出一出力就入到!」

「我兩個小朋友冇咁嘅資質入到band 1.,我都疊埋心水BAND 2尾就算。」

「有啲家長幼稚園開始培育小朋友,一體一藝,FTM由幼稚園開始陪讀,其實背後真係付出好多,無人知。」

討論區熱話:其實要孩子入讀到傳統名校,要付出幾多努力

討論區熱話:其實要孩子入讀到傳統名校,要付出幾多努力

其實做父母嘅就梗係想比最好自己嘅仔女,但成日都講讀書世界似乎並無最好,就只有最適合,正所謂物極必反,過度嘅壓力落喺仔女,抑或家長身上都唔係好事。

至於入名校係咪只為「名牌效應」?鯊魚太就認為名校吸引力除咗名氣,其實都仲有啲條件優勢嘅,好似話讀書氣氛、師資、教學方法等等,講真自己都讀過書,老師教得幾好,都唔夠朋輩影響力大,若然身邊嘅同學都係許願花時間爭取好成績,自自然然仔女都覺得溫習係「理所當然」。

咁當然唔可以話非名校就無讀書人,名校學生就一定讀到書,只係按往績嚟睇,名校讀書氣氛比較有保證,所以有得揀咪揀囉,有得爭取咪盡力為仔女入到較理想學校囉;其實無論係家長為仔女鋪路入名校,抑或仔女讀書成績,只要盡力而為就好。

【編按:以上內容為作者之個人意見及立場】

相關文章

成績再好亦不及品德重要 媽媽心聲:「唯一重視佢哋有冇感恩嘅心! 」

【幼稚園面試】多角度拍攝、光線位!拍片面試貼士+注意事項+3個拍片程式推介

退或留?家長進退兩難!疫症引發幼稚園、學前班的退學潮

幼稚園就叫小朋友自己做功課? 網民:題目都未識睇!點做?

緊貼新冠肺炎最新相關資訊