2020-07-28

2.7K

【新冠肺炎】1家4口列緊密接觸者須隔離 港爸︰讓孩子知道幸福非必然

最近本地確診個案日日創新高,好似同確診者嘅距離越嚟越近咁…唔好話怕確診,連要隔離14日都怕怕呀!

討論區熱話:假如中咗/或需要入住檢疫隔離(非家居), 你哋會執....

幾日前有位港爸因為家人確診,自己連同老婆仔女共4人要入住駿洋邨隔離14天。1家4口被安排住喺一個有2間睡房嘅單位,港爸就出咗個post分享入面嘅情況,仲有帶咗嘅物資︰


  1. 冇冷氣、雪櫃、洗衣機 (因為係新公屋,準備交樓俾租客,所以可以理解)

  2. 手機網絡接收差,屋內有wifi提供

  3. 有床板、床墊、床單提供

  4. 每日免費提供3餐
    可WhatsApp中心提出想要嘅物資 (如:杯麵、紙包飲品、水、廁紙)

  5. 有電視提供,可以連接HDMI,可以帶PS4 / Switch

  6. 水果不定時由社署提供

  7. 唔清楚有冇洗衣液提供,我自備咗,再用個厚身膠袋裝水手洗洗衫,有衣架提供晾衫

  8. 單位內有窗簾

  9. 冇冷氣係最大嘅問題,但真係會慢慢適應,一日起碼沖幾次凍水涼,同埋都唔會出街,所以就咁著條短褲就算,又可以洗少啲衫又可以涼啲。

  10. 有專車會接送到隔離中心

  11. 有小朋友嘅家庭一定要帶玩具 (小型game、畫畫等)

  12. 我自己帶咗好多嘢... (空氣清新機、營養保充品、牙膏、牙刷、洗頭水、梘液、大

  13. 食糧、水果、毛巾、衫褲、吹氣梳化、風扇、Switch、小朋友玩具、消毒啫哩、乾濕紙巾、拖鞋、床單、枕頭袋、拖板)

  14. 拖板、冷風風扇 好重要

  15. 單位有提供 牙膏、牙刷、抹面毛巾、杯、叉、匙羹、碟、電視、風扇、wifi、枕頭、床墊、床單、衣架

  16. 指定牌子衛生巾 / 尿片 / 兒童學習褲 要WhatsApp中心向社署申請訂,需要兩三日時間

  17. 有電熱水爐提供


呢位港爸除咗喺物資上準備充足之外,心態上都做好準備。「父母對今次隔離嘅心態好影響小朋友,所以大家要加油,就算真係要隔離都唔緊要,當係一次入訓練營嘅體驗,俾小朋友知道凡事唔係必然,冷氣唔一定有,好食又一餐,唔好食又一餐。」

他條媽媽覺得呢位港爸EQ超高,亦都係個好好嘅榜樣啊!講真,呢個年代大人細路都習慣有冷氣又方便嘅生活,呢14日突如其來嘅隔離,換個角度睇都係一種學習!所謂心態決定境界嘛,環境係點、發生咩事都好,選擇正面面對囉!最緊要都係一家人齊齊整整,身體健康!

港爸最後仲衷心感激醫護人員同民安隊,喺咁多單case之下依然緊守崗位,為佢哋一家送食物同物資。呢個亦都係教小朋友要感恩同飲水思源嘅好時機啊!

討論區熱話:假如中咗/或需要入住檢疫隔離(非家居), 你哋會執....

好彩,呢一家人暫時身體都健康,冇任何病徵!他條媽媽喺度都祝福佢哋一家可以平平安安過晒呢14日!

【編按:以上內容為作者之個人意見及立場】

相關文章

Tested Positive : 你回香港隔離的日子

史上最難申請季?疫情之下的英國寄宿學校申請實況

緊貼新冠肺炎最新相關資訊