2020-09-07

1.6K

【有苦自己知】在職媽媽的WFH日常:「對不起,媽媽的冷淡待慢了你!」

由於疫情反覆有唔少公司都會因應情況,而安排員工在家工作(WFH),以減低員工傳染機會,有幸可以WFH嘅我,其實都真係幾高興,之不過呢份高興並唔係因為WFH等於唔使做,而且在家工作真係隨時有開工無收工,但話晒屋企都有隻小魔怪,減少必要外出機會,點都係安心啲嘅!

然而世事都總係有兩面,作為一位媽媽喺別人眼中嘅WFH大概係:「你就好啦,可以在家工作,時時刻刻見到阿仔!」,的確呢段時間係多咗時間望住個仔,但就只限望住囉,想同佢玩?陪佢做下功課?睇下書?你估真係唔使做咩?

老老實實,其實一個3歲嘅小朋友又點知咩係WFH,喺佢哋眼中咪就係:「好嘢!爸爸媽咪喺屋企!」即使佢能夠理解你係返緊工,但又未必可以完全明白返緊工嘅意思,再者佢真係理得係返緊咩,想黐實你根本就係佢本能!「媽咪,陪我玩!」、「媽咪,陪我睇電視!」、「媽咪,我想你陪我!」,有時忙起上嚟真係「媽到暈」!

雖則「被需要」嘅感覺係Sweet到漏,但喺你最繁忙又或者開緊會嘅種種「危急狀況」下,佢依然咁需要你,都確係有啲吃不消,甚至都會忍不住情緒大聲斥責佢...不過剛剛衝口而出嘅一秒,下一秒就後悔,其實佢都係想你陪下佢啫,有咩做錯啫?當你想講對唔住咩?遇著佢暖男上身同你講:「Is okay 」,真係令人更加內疚,就算唔喊出嚟,都熱淚盈眶啦!

不過講到尾,WFH都可以話係一個不一樣體驗,其實都有好多值得記住嘅點滴,記得有一次做好忟憎嘅時候,忍不住「咆哮」咗一下,而自己玩緊嘅佢,竟然慢慢行過嚟,摸住我手仔話:「唔好咁啦!」望住佢嘅身影,仿彿又見到佢成長嘅另一面...

【編按:以上內容為作者之個人意見及立場】

相關文章

在職媽媽也能當稱職老婆 夫妻關係在乎溝通與尊重!

孝唔孝順7成係天生?網民:先天幾孝順 父母唔識湊孝孝下都心淡

停課期間親子關係惡化?三個方法助你平復親子衝突

【全民停課】停課期間你想學校點安排?網民:唔好睇片就當教咗!

緊貼新冠肺炎最新相關資訊