新冠肺炎疫情一日嚴重過一日，今年農曆新年除咗講新年快樂，相信大家最想收到嘅祝福都係「身體健康！」
講返今次爆發新冠肺炎，簡直就係同農曆新年「撞晒期」，確係令人「心好累」，各位媽媽們一心以為過年前東奔西跑辦年貨，大掃除、打理大小事務後，終於可以趁過年抖抖，開開心心同姨媽姑姐們吹下水，點知又要為頭家披上防疫戰衣，辦完年貨就要撲口罩，呢頭買到，果頭又話唔係款款都可以防病菌，搞到個個都變晒口罩分析大使！而喺大家撲緊口罩嘅同時，其實有唔少家長都諗緊係咪需要自行停課......
「幼稚園同小學生衛生意識唔高真係好危險！」
「新年假大把人唔理照返大陸！開學先係爆發期！」
「讀書啫！唔駛搵命駁！」
而隨住初一宣佈學生們齊齊停課至2月17號，其實家長反應都幾兩極，有人話呢個方案原意係好，比返咗內地嘅學生自行隔離14日無事先返學，之但係若然已經回鄉探親嘅家庭見到放多幾日又留多幾日，其實最後又有無防疫作用呢？
討論區熱話： 有冇人農曆新年假期後自行停課？
討論區熱話：仲會唔會帶住口罩入屋拜年？（或取消拜年）
另一方面，新年流流梗係要拜年？但今年似乎就連拜年都要諗清楚先，皆因人多地方好容易傳播疾病，但出外拜年食飯，又唔可以一直帶住口罩，在情好似唔多夠禮貌，在理其實帶住口罩點食飯？其實疫情愈來愈嚴重，唔好話拜年呀，就連出門口都令人有啲卻步，鯊魚太都有唔少拜年活動都取消晒，再唔係就係親戚甩底。
「諗諗吓今年唔係好想拜年。」
「取消拜年活動，會去老人家屋企坐陣傾下計即走。」
「入屋會除，有病嘅唔好拜年，在家休息下！ 」
講到尾，其實大家都係想開開心心咁過年，如果真係有唔舒服，點都唔會想傳染屋企人啩，所以若然自己係高危人士，就應該留家休息或者自我隔離，敏感時候大家都應該注意衛生，咁樣自然大家都安心，始終都係身體健康最重要！
討論區熱話： 有冇人農曆新年假期後自行停課？
討論區熱話：仲會唔會帶住口罩入屋拜年？（或取消拜年）
