2020-04-30

1.8K

【JM有話兒】 生多幾胎係為咗咩?養兒防老定想仔女將來互相照應?

「生唔生小朋友?」、「生幾多個?」、「生唔生多個?」呢啲問題,相信唔少夫妻喺規劃家庭嘅時候都有考量過,而好多時亦會聽人講:「生多個,有兄弟姊妹等佢哋將來有個照應!」,但其實呢個「照應」又係唔係我哋諗得噤理想?以前嗰輩或者都有養兒防老嘅概念,但依家呢一代嘅家長,反而日思夜想都係為子女將來:「佢養得掂自己就得,養唔養我都好閒。」,更加有人辛苦一世,都想買層樓比仔女,等佢哋「將來」有瓦遮頭,但咁又係唔係真係最好嘅後盾呢?

最近有就JM問到各位「一孩家庭」嘅家長,有無後悔唔生多個,其實普遍決定只生一個嘅家長們都無話特別後悔,似乎都明白「針無兩頭利」呢個道理;生多幾個,喺仔女嘅成長路上係有個伴,將來屋企有咩大事亦多個人商量,之但係生多幾個,同時都要面對偏心與否同資源分配嘅問題!

「我個仔已經做嘢 ,中學好激氣, 絕對唔後悔生一個,好彩冇生第二個, 佢由細到大都好開心冇話要細佬妹, 見到同學有細佬妹話好彩自己冇!」

「生一個夠喇!有伴成長係好少少,無咁悶囉! 」

「一個有一個嘅好,兩個有兩個嘅開心,最緊要自己兩公婆有共識,子女緣唔係你想有就會有。」

「我係獨生女,一個已經足夠,最重要教曉佢點樣搵到人生好伴侶! 」

討論區熱話:生一個,但仔女已長大嘅JM請入

討論區熱話:生一個,但仔女已長大嘅JM請入

講到呢度,有JM就突破盲腸話:「其實有時係大人自己一廂情願嘅想法,覺得兩個以上一定好啲或有個照應。」同時都帶出鍾唔鍾意有兄弟姊妹,其實都好睇小朋友性格,鍾意同其他小朋友玩,同有兄弟姊妹又係兩碼子嘅事,而且相處落能唔能夠和睦都係一個未知!

至於偏唔偏心嘅問題,好多父母表面都話會一視同仁,但其實好多時外人都好明顯睇得出有偏心,唔想小朋友喺呢個感受下成長,就要好好諗清楚;若然真係想仔女將來有個可靠又啱Key嘅伴,或者學上面JM話齋,搵個適合自己嘅人生伴侶仲實際,所以話成日都講為仔女「將來」,倒不如望清楚現在再作打算,始終人生係佢哋嘅,任你鋪好再好嘅路都唔一定適合佢,有時候陪佢哋行出自己嘅路,可能先係王道。

【編按:以上內容為作者之個人意見及立場】

相關文章

【有得必有失】後悔決定生B做父母? 網民:「你都無問佢想唔想出世啦!」

派錯利是好尷尬?5項派利是須知

【父母最痛】說再見有學問!如何為孩子減輕分離焦慮?

緊貼新冠肺炎最新相關資訊