2020-03-31

1.9K

【JM有話兒】留學生返港抗疫欠自律!千錯萬錯都係父母錯?

疫情蔓延全球,唔少父母都急急幫留學中嘅仔女買機票返港,此舉絕對係人之常情!之但係有部份學生返港之後,就好似唔太聽話,竟然帶住防疫手帶都周圍走,仲好似慌死無人知咁放上網唱通街,咁結果就緊係比人鬧爆啦!大佬,依家全民防疫呀,你估閣下返嚟渡假兼大曬買到名牌限量手帶咩!

呢班留學生嘅行為,除咗惹來大眾質疑防疫手嘅實用情況之餘,亦令大眾又擔心又嬲豬,仲有人話父母們無好好管束仔女先係罪魁禍首!莫非真係自私的人有福了!?

而事實上,又唔係所有留學生父母都會選擇放任佢哋嘅仔女嘅,有JM就早喺女女返港前就問定大家應該點樣做好家居隔離同防疫工作!

「建議調返轉,家人住酒店好啲,酒店中央冷氣, 除非完全唔開。」

「全家一齊戴口罩,衣物分開洗,早晚同佢哋探熱, 1比49 漂白水清潔。」

「儘量留係房,唔好一齊食飯,出廳就帶口罩,放定消毒濕紙巾係廁所,每次用完都消毒!」

討論區熱話:女快回港,怎樣家居隔離
討論區熱話:留學生啲父母去哂邊?希望你地自律

而另一方面,成日都話一樣米養百樣人,有好嘅,就梗有唔好啦,咁欠自律嘅一群,到底係自己個人修養有問題,定應該怪佢哋嘅父母?係咪真係「養不教,父之過。」?

「留學生啲質素,真係冇眼睇!」

「嗰啲人根本唔啱做人父母啦,只識寵壞自己仔女!」

「唔好一竹篙打一船人,我仔3月14日返到香港,按照政府嘅檢疫措施,係無需強制家居檢疫,但佢都乖乖留在家冇出過去,我都 work from home 看住佢,仲有5日就放監喇!」

睇完大家嘅留言,Juicy媽就覺得雙方都責無旁貸,所謂嘅個人修養,某程度都由身教而生,亦有啲情況係因為恃寵生嬌而成,當然你要點教仔女我就管唔到,之但係你寵就還你寵呀,依家非常時期,無理由要隔離枱三唔識七嗰個陪你找數啫,若然件事調返,你又接唔接受到先?

Juicy媽都係父母,明白仔女山長水遠返到嚟,想食餐好都好正常,若然咁都做唔到,都會覺得自己好失敗,但其實要食餐好,唔係好多方法咩?至於出去吃喝玩樂嘅年青人,你哋返嚟唔係放假咖,父母千辛萬苦撲張貴價機票比你,係避疫唔係渡假!會死人咖!連咁基本嘅自制能力都無,仲要令父母擔心、令佢哋比人鬧無好好管教你哋?依家唔單止係你有機會傳染人,其實你出去都一樣有機會被傳染,香港唔係零感染,唔係「免疫區」!

希望經過呢幾位留學生犯下嘅錯誤,會令公眾都明白事情嘅嚴重性,事到如今要打贏呢場仗,自律絕對係非常重要嘅元素,防疫係要每個人都無事先係「真無事」,好好反思個人行為會唔會影響到人,又或者係咪自私到無朋友,唔好只係因為怕被起底、被發現,而再去諗方法避過大眾目光,諗方法拆咗佢、遮住佢就繼續馬照跑、舞照跳!

【編按:以上內容為作者之個人意見及立場】

相關文章

【JM有話兒】限聚「逼」三母子分枱 餐廳職員:覺得自己好涼薄

4歲仔被迫與媽媽分枱後爆喊 港媽感不滿卻被網民斥自私

【復課安排】1.11未能復課 媽媽崩潰:受夠了!我後悔生佢出嚟!

留學生注意!由非中國地區抵港前須酒店檢疫 (附回港檢疫懶人包)

緊貼新冠肺炎最新相關資訊