相信唔少父母喺帶BB車出街嘅時候，都總會遇過啲激氣事，尤其係乘搭交通工具，明明收好晒車都有機會畀人指指點點，好似話：「咁大架車阻住晒！」、「小朋友咁大個仲坐車！」、「帶BB車就避開繁忙時間啦！」真係EQ低啲都隨時釀成口角，咁到底小朋友幾多歲帶BB車出街先合理？
最近就有JM因為準備大掃除，向大家集思廣益：「請問各位覺得士的車（折疊式嬰兒手推車）坐到幾歲合理? 」綜合網民們意見，總括有兩個考慮嘅重點，第一係小朋友仲肯唔肯坐BB車，第二係假如同小朋友出街，又無揸車代步，行耐咗小朋友扭抱，或者瞓著咗，隨時抱到手都斷：「4歲已經K2，叫小朋友自己行啦！ 」 、 「我用到 K3，有時長途，去太夜就會用，佢可以舒服咁睡，我又唔駛抱到手斷」 、「我仔1歲半唔肯坐！」
討論區熱話：BB車要坐到幾歲？
討論區熱話：BB車要坐到幾歲？
講到尾用到幾多歲本來就應該係按個人或者小朋友需要，而且BB車本身就有建議使用年齡同重量，家長喺考慮用到幾多歲嘅時候，都要了解超齡使用BB車會唔會對小朋友身體健康，或者心智發展有影響，出現過份溺愛問題！
鯊魚太曾經睇過一啲兒科醫生研究，當中指出：智力同行動正常嘅小朋友踏入探索期就自然會表現得主動同活躍，要佢哋困喺BB車，絕對唔係一件容易嘅事；如果小朋友到咗4至5歲，仍然主導過份依賴BB車，會令佢哋缺乏運動，性格亦有可能變得唔主動，但若果只係用喺幫輕父母外出，等小朋友瞓咗可以放低一陣，又係另一個說法啦。
