今日小小豬有件事令我有感而發，佢竟然整濕個玩具地拖，再裝滿一桶水，話要幫手做家務，幫我洗地呀！佢唔係玩玩吓，十分認真，好用力咁用佢個玩具地拖擦擦擦個地板！
小小豬仔蹲低喺地下大大話話有成十五分鐘，依段時間都係好專心咁擦地。當佢覺得乾淨時，就滿心歡喜咁同我哋講「完成」，睇見佢個笑容都感覺到佢好有滿足感呀！
其實小小豬之前都有用佢啲打掃玩具幫我掃地拖地，不過都係三兩下之後就走咗去，咁專心同加埋水去做都係第一次。
我見到佢用水拖地時，第一個反應係「想C呀……又係度玩水」，仲好想即刻停止佢依個舉動，因為我覺得佢都係玩多。不過細心諗，可能平日見我哋用水拖，佢當然係跟返我哋嘅做法啦！所以就等佢慢慢自己做，想睇吓之後會係點。
慶幸我沒有阻止，如果唔係就見唔到小小豬完成後個滿足眼神，同埋令我覺得小小豬又大個仔多一步啦！當然，之後我係要幫佢執手尾，要再拖過地同埋幫小小豬由頭換過晒啲衫(因為佢太落力，攪到濕晒呀！)，不過嗰一刻我又真係幾享受依個執手尾過程。
有時我都會諗，係唔係對小小豬嘅要求過高？當見到佢做一啲反常事時，我就批定佢係度搗蛋？
不過，經過今次事件之後，我就明白要學懂放手同埋理解，凡事都係有兩面睇。雖然表面係做緊一啲搗蛋事(當然我指唔係一啲勁過分嘅事啦)，但最後得出個答案係……其實都係表達緊佢乖一面，只係佢嘅能力未能做到，所以令我有錯覺。
所以話，乖仔、搗蛋都係只差一線，視乎我地點理解同小朋友點表達。其實我都覺得幾難，不過我都會努力學習，希望可以做到一個好媽媽啦！
