2019-04-30

14.4K

你凍唔代表BB凍,唔好再話佢著得唔夠衫!

琴晚飲茶時,見到隔離檯有位婆婆係咁同個後生媽媽講:同BB著返件外套喇,一陣冷親呀,一陣又感冒又點點點點點架喇。八卦望一望個小朋友,嗯,個額頭仔係少少汗嘅。

呢一幕簡直喚起我萬馬奔騰嘅悲痛回憶。仲記得啱啱生B時,當然一屋人都好興奮,然後外婆一句「好凍呀同佢加件被仔喇」、嫲嫲一句「咁唔夠暖架著多件背心啦」。真係好想大叫一句STOP!我個小朋友唔係糭囉,OK?!包到咁你哋唔覺得唔正常咩?

其實熱唔熱、凍唔凍呢啲真係好個人。即係如果老人家怕凍,又唔可以直接將感觀代入BB度。最可行都係實時摸下BB頸仔同背脊,感受下佢體溫啦。仲有,其實,熱都辛苦架,焗親都一樣會病!

唔明點解有啲長輩鍾意做過氣先知或馬後炮,斷言「今次BB流呢滴鼻水係因為上星期一你唔聽我講幫佢加件衫!」然後再加句:「我都話架喇!」

真係好想好似大小姐咁講句:「Shut Up!」做人媽媽已經好多嘢諗、好大壓力,有時真係好怕身邊人嘅負面說話,簡單啲嚟講——出少句聲就最好!為BB好大家都明,但真係唔使太過份,有邊個呀媽唔想照顧得BB妥妥當當?

【編按:以上內容為作者之個人意見及立場】

相關文章

【港識教育】8大育兒常見情景 爸媽勿亂說話影響孩子身心發展!

日本哺乳室張貼一文章《媽媽的每一天》完美剖白為人母親心聲 網友淚崩:超寫實!

【兒童節目】幼童沉迷看《CoComelon》猶如興奮劑會上癮 推薦10個低刺激性節目!

4歲童因雪糕被吃掉氣憤報警 哭訴要媽媽坐監:媽媽不聽話 !

緊貼新冠肺炎最新相關資訊