做咗阿媽後 覺得自己唔似女人......

做人呀媽甚艱難，呢樣嘢我生咗大仔後已經深深體會到。網上討論區有媽媽話自己係一個「唔似女人嘅女人」，睇到juicy媽眼濕濕。

做咗阿媽嘅女人會點？出街執BB嘢都踢曬腳，莫講話化妝；冇時間做facial、敷媽屎、夜晚氹完bb瞓覺，攰到連cream都唔想搽。甚至連買衫、買鞋嘅動力都冇。都話呢個世界冇醜女人，得懶女人……同已經放棄自己嘅女人。見到有網民話自己畀人當男人添呀陰公。

每當juicy媽見到男人話自己老婆生咗之後走晒樣，冇當年咁省鏡，都會眼火爆！啲男人真係針唔銡到肉唔知痛，有時間扮靚嘅話，邊個女人唔想靚？

好多媽媽都留言話咁嘅情形好正常，等BB大啲就好啲架喇。冇計喇，小朋友仲細嘅時候梗係想照顧好佢。陪住佢健康成長就滿足，其他嘢邊得閒理咁多。有網友講得好，嗰段時間直頭係達到忘我、與世隔絕嘅境界。到啲細路升小學，我哋就可以重獲新生喇（怪獸家長除外）！

都有媽媽話接受唔到自己太頹，驚幾年後先勤力，點keep都差咁啲。平時都會見縫插針咁敷吓Sleeping Mask，好過咩都冇。做家務時又可以注意姿勢，當做健身。買衫買鞋又可以網購，輕鬆等貨上門。

Juicy媽覺得，做到幾多咪做囉！最緊要自己開心啫。

各位媽媽，共勉之！

即刻Click入討論區一齊傾