2020-05-28

1.1K

孝唔孝順7成係天生?網民:先天幾孝順 父母唔識湊孝孝下都心淡

組織一個家庭其實真係唔容易,當中包含住千絲萬縷嘅關係,無論係婆媳、夫妻,甚或至係親子之間嘅感情,都需要一點一滴咁去累積同培養,但又係唔係所有事情都係種瓜得瓜,種豆得豆呢?

最近就有JM喺討論區大吐苦水,講到自己辛辛苦苦湊大個仔,明明同佢關係一直都唔錯,但係直到仔仔反叛期,兩人關係不進則退,仔仔仲居然話呢位JM湊大佢,都只係為咗錢!?莫講話呢位JM聽到心碎,我哋呢啲作為旁人都戥佢心痛;睇到呢度有JM都不禁問:「仔女孝唔孝順到底係天生定後天育成?」

「孝唔孝順,都係睇先天性格;大前提,父母梗係自己都要有盡父母責任先得啦。」

「我信有啲仔女係嚟討債,有啲係嚟還債,做好自己父母責任,對得住仔女同自己,咁就算了....」

「我覺得先天係佔大多數加少部份父母子女間關係。睇到有 JM話父母童年對佢哋唔好,大咗雖然有怨恨,但仍侍奉終老,呢啲咪先天孝順。」

討論區熱話:仔女孝順(先天/後天)
討論區熱話:有無人好似我咁,湊大個仔後,原來個仔一點也不愛你

討論區熱話:仔女孝順(先天/後天)
討論區熱話:有無人好似我咁,湊大個仔後,原來個仔一點也不愛你

有人話老土啲講句,孝唔孝順其實都係睇緣份?確係嘅,每個人生出嚟性格唔一樣,有時唔夾就係唔夾,實在勉強不來,之不過基本禮貌同尊重都係可以由後天培養;站喺兩邊去睇,我哋既為人父母亦係人哋嘅仔女,面對住呢個問題,其實多多少少都有個答案。

首先,撇除夾唔夾呢個先天因素,其實自己點對自己父母,仔女都會放喺眼內,所以成日話身教真係好重要,若然自己都唔孝順,又講咩要被孝順。另一方面,一樣米養百樣人,有人就話兄弟姊妹都有孝順之別,其實又會唔會關乎到父母偏心問題?唔係話偏邊個,邊個就孝順,有時候過份寵愛,自然會令仔女覺得好多嘢都係應份,變成唔識珍惜,仲諗佢會唔會孝順自己?所以話,其實有啲嘢可能唔多唔少自己都有啲責任,若然先天不足,同時都睇你後天點樣拿捏,人心肉造,每段關係都會經歷高潮、低潮,或者過咗反叛期,甚至將來佢哋做人哋父母嘅時候,就會明白你嘅苦心!

 

【編按:以上內容為作者之個人意見及立場】

相關文章

【有得必有失】後悔決定生B做父母? 網民:「你都無問佢想唔想出世啦!」

【疫情下向家人送暖】撰寫溫馨、鼓勵語句,有機會換領「家事研究所」遊戲咭乙份

疫症見人心!網民:一個口罩睇清楚好多人

【致摯愛】一封寫給爸爸的信

緊貼新冠肺炎最新相關資訊