唔知各位媽媽們仲記唔記得自己成為媽媽之前，手機相簿入面載滿住嘅係咩相呢？美食照？風景相？還是自己嘅自拍大頭？題外話，日前先發覺，新一代已經唔影自拍，換成Moody嘅全身背影圖，well～anyway！（有時真係唔認老都唔得！）
然而做咗人哋阿媽之後，電話入面可以話係清一色阿仔寫真，有時人哋問起：「你隻貓係咩樣咖？」都搵唔到一張近照比人睇...... 無錯！我哋屋企有養貓，仲有3隻咁多添！轉眼間，大佬同二哥都已經十幾歲，算係個上咗年紀嘅阿伯。
講到寵物與小孩，喺未有BB之前，有人可能會覺得小朋友同寵物一齊成長，除咗可以培育佢哋嘅責任感之外，同時會令佢哋更懂善待別人，但當你切實地面對呢個畫面，竟然有唔少家庭演變成「寵物與小孩到底可唔可以共存？」嘅問題；在我自己立場，對於因為懷孕，而衍生出各種棄養小動物嘅原因同行為，都係不能理解，最老土咁講，養動物同生小朋友一樣，佢嘅來臨都係由你主導，而呢個主導同時係一個承諾，佢哋有血有肉，絕對唔係一件玩物！
而且小動物世界真係好細，你就係佢嘅全部；如果連對小動物都無一份承擔，更莫講可以對一個人嘅人生負上責任。
回想當日有咗定咩之後，都曾經面對（少少）長輩壓力，無飼養寵物嘅佢哋可能會講出一啲幾匪夷所思嘅說話，雖然聽落確實令人有啲激氣，但可以理解嘅係，其實佢哋所有唔經大腦嘅說話都係為咗你同BB好，所以先嘗試唔好嬲嬲豬住，面對呢個情況，既可以以笑帶過，又或者以實證證明，其實寵物與小孩係可以並存，當中只係需要作出一定程度嘅配合，就唔會有壞嘅影響，咁做就大家都放心又安心啦！
好似有唔少愛貓之人都曾經搜尋過「孕婦養貓會感染弓形蟲」嘅問題，其實先決條件係貓貓要食到受感染嘅生肉先有可能中招，所以一般不外出嘅家貓感染度可以話係極低，而即使貓貓有弓形蟲，又點樣先會傳到你度？就係要食咗有蟲嘅貓便便......至於有無可能發生？咁又唔係話無嘅，所以如果真係有呢方面嘅疑慮，懷孕期間，可以請老公代為擔任鏟屎官，而執勤後，徹底清潔雙手，咁就無問題啦！
最後，小朋友同寵物一齊長大會唔會令佢學識啲咩，我唔敢講亦未有定論，畢竟教育小朋友斷唔會係貓貓嘅責任；我只可以講，佢哋必定係彼此成長嘅好朋友。
