2018-07-23

19.2K

港爸讚《BB來了》有共鳴 新手爸5大辛酸時刻:總之咩都係我錯哂啦...

最近TVB劇《BB來了》,講盡一班媽媽有生B湊B有幾辛苦,獲得一眾港媽大讚有共鳴!但其實都同樣有港爸讚劇情反映到佢地嘅苦況,劇情開始講到Elvis爆煲喊出黎,咁啱又有網民出POST講:其實爸爸係唔係都會出現產後抑鬱…?而家就同大家精選《BB來了》港爸5大共鳴辛酸位!話畀各位爸爸知道:I know that feel, bro!

 

老婆眼中得BB


劇中Elvis錫老婆錫到出哂面,兩公婆未有小朋友前都好恩愛。但BB一出世,老婆眼中得阿女,自己好明顯被忽略,老婆對自己嘅態度都唔同哂,實在係唔好受…心入面其實想講:我都想有人錫架!

 

BB眼中得媽咪


隨著劇情提及黎諾懿因為太大壓力,開始出現怪異行為,為咗順利做餵奶爸,就自製餵奶Bra,嚇親Ali!的而且確,阿爸無十月懷胎生你!但其實一樣咁錫你,餵奶你又唔肯飲,一抱住就喊!你唔好蝦老豆先得架阿女…。

 

經濟壓力變得好大


想老婆舒服啲做Full-time Mom,就更加要爭氣搵多個錢。以前兩個人搵兩個人使;而家一個人搵,三個人使,仲要畀埋家用、屋租…,唔單止支出大咗好多,壓力都大咗好多。為咗頭家,尊嚴又算得係咩。

 

夾喺幾個女人中間


男人就係最怕麻煩嘅生物,家和萬事興就最好喇!但Elvis夾係老婆、阿媽同外母呢三大「猛獸」中間,為咗BB同錢銀成日鬧不和!偏幫其中一邊,死;全部唔幫,死得仲快啊!

 

做咗出氣袋


為咗大家好過啲,爸爸都會擔當出氣袋角色!老婆唔開心,一定係我做得唔好;阿媽唔開心,一定係我處理得唔好!咩都認哂衰,死忍難忍,其實咪就係令到自己宣洩唔到壓力囉。所以成日都聽到話啲好好先生,一爆起上黎好大火氣,就係因為平時無講出心底話。所以都借呢個機會同各位媽媽講,雖然老公係成日傻下傻下、論論盡盡、咩都做一半…但如果你都體諒佢嘅辛酸,得閒就錫返佢啦!

 

入黎討論區一齊傾


相關文章

【父母精明眼】新手爸媽必讀!BB用品選購攻略(室內篇)

【Pampers X 惠康全年最低價優惠】 BB展延期無晒荀嘢?去指定惠康有BB展尿片價優惠!

【媽媽美肌教室】K.O. 皺紋過早出現成因!5個不容忽視的護眼要點

【好姐姐難求】為僱主著想願留家避疫 港媽感恩:多一個人錫囝囝

緊貼新冠肺炎最新相關資訊